އެއްވެސް ހައްގަކީ ތަބަކަކަށް ލާފައި ދޭނެ އެއްޗެއް ނޫން ކަމަށާއި ހައްގުތައް ހޯދަން ޖެހޭނީ ނިކުންނަށް ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާލުވެއްްޖެއެވެ.

ރައީސް ސޯލިހް މިހެން ވިދާޅުވީ، "ގާނޫނު އަސާސީގެ ދިފާއުގައި" ނަމުގައި މިރޭ ކާނިވާ ސަރަހައްދުގައި އެމްޑީޕީން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މިހާރު ރާއްޖޭގައި އަމަލު ކުރަމުން އަންނަ ފެހި ގާނޫނު އަސާސީ ހޯދީ އެތައް ބައެއްގެ ގުރުބާނީއަކާއި އެތައް ބުރަ މަސައްކަތަކާ އެކުގައި ފާހަގަ ކުރައްވަމުިން ރައީސް ސޯލިހް ވިދާޅުވީ، ފެހި ގާނޫނު އަސާސީ އަށް ބަދަލު ކުރުމުގެ މަސައްކަތަކީ ރައްޔިތުންގެ ބާރު ހިނގާ ވެރިކަމެއް ގެނައުމަށް ކުރި ބުރަ މަސައްކަތް ކަމަށެވެ. އެ ގާނޫނު އަސާސީގައި 14 ބާބު އޮތް ކަމުގައި ވިޔަސް އޭގެ އެންމެ މުހިއްމު ބާބުތަކަކީ ފުރަތަމަ ދެ ބާބު ކަމަށެވެ.

އެ ދެ ބާބުގައި ރައްޔިތުންގެ ހައްގުތަކެއްގެ ވާހަކަތައް ލިޔެވިފައިވާ އިރު، މިއަދު އެއްވެގެން މިއުޅެނީ އެ ހައްގުތަކުގެ ދިފާއުގައި ކަމަށް ސޯލިހް ވިދާޅުވިއެވެ. ބަސް ބުނުމުގެ މިނިވަންކަމާއި، މައުލޫމާތު ހޯދައި ލިބިގަތުުގެ ހައްގާއި، ޕެންޝަން ލިބިގަތުމުގެ ހައްގާއި، ހިލޭ ބޭސްފަރުވާ ދޭން ޖެހޭނެ ކަން ކަށަވަރު ކުރި ނަމަވެސް މި ސަރުކާރުން ވޭތުވެ މިދިޔަ ދުވަސްތަކުގައި މި ހައްގުތައް ނިގުޅައިގަންނަން މަސައްކަތް ކުރަމުންދާ މަންޒަރު ފެނިވަޑައިގަންނަވާ ކަމަށް ސޯލިހް ވިދާޅުވިއެވެ.

މި ސަރުކާރު ވެރިކަމަށް އައުމަށް ފަހު އެންމެ ފުރަތަމަ ހަމަލާ ދީފައި ވަނީ ނޫސްވެރިންނަށް ކަމަށާއި ނޫސްވެރިންނަށް ބިރުދައްކައި ނޫސްތައް ބަންދުކުރަން މަސައްކަތް ކުރި ކަން ސޯލިހް ވިދާޅުވިއެވެ. ނަމަވެސް އެ ދުވަހު ނޫސްވެރިން އެކަމާ ކެރިގެން ކުރިމަތިލި ކަމަށާއި އޭގެ ނަތީޖާއަކަށްވީ ސަރުކާރު ފަހަތަށް ޖެހުން ކަމަށް ސޯލިހް ވިދާޅުވިއެވެ. ނަމަވެސް އެއަށް ފަހ މަޖިލީހަށް މީޑިއާ ކޮންތްރޯލް ކުރުމަށް ބިލެއް ހުށަހެޅި ކަން ސޯލިހް ފާހަގަކުރެއްވިއެވެ. މިއާއެކުވެސް ނޫސްވެރިން ފަހަތަށް ނުޖެހި ކުރި މަސައްކަތުން އެ ބިލު ވަނީ އަނބުރާ ގެންގޮސްފައި ކަމަށް ސޯލިހް ވިދާޅުވިއެވެ.

ނޫސްވެރިންގެ ހައްގުގައި ކުރި މަސައްކަތް މިސާލެއްގެ ގޮތުގައި ދައްކަވަމުން ރައީސް ސޯލިހް ވިދާޅުވީ، މިއަދު އެންމެން ވެސް ފަހަތަށް ނުޖެހި ހައްގުތައް ހޯދަން މަސައްކަތް ކުރަންވީ ކަމަށެވެ. މިގޮތަށް ފަހަތަށް ނުޖެހި ނިކުމެއްޖެ ނަމަ ރައްޔިތުންގެ އަޑު އަހައި ރައްޔިތުން ބޭނުންވާ ގޮތަށް ކަންކަން ކުރަން ސަރުކާރަށް މަޖުބޫރު ވާނެ ކަމަށް ސޯލިހް ވިދާޅުވިއެވެ. އެމްޑީޕީ މިއަދު މިއޮތީ ރައްޔިތުންނާ އެކީގައި ކަމަށާއި ފަހަތަށް ނުޖެހި މަސައްކަތް ކުރުމުން ރައްޔިތުންނަށް ކާމިޔާބު ލިބޭނެ ކަމަށް ސޯލިހް ވިދާޅުވިއެވެ. ރައްޔިތުންގެ ހައްގުތައް ހޯދައި ދިނުމަށް ކުރަން ޖެހުނު ކޮންމެ ކަމެއް ކުރަން ތައްޔރަަށް އެމްޑިޕީ އޮންނާނެ ކަމަށް ސޯލިހް ވިދާޅުވިއެވެ.

އެއްވެސް ހައްގަކީ މީހަކު ހެޔޮ ހިތުން ތަބަކަކަށް ލާފައި ދޭނެ އެއްޗެއް ނޫން ކަމަށާއި ހައްގުތައް ޖެހޭނީ ހޯދަން ކަމަށް އެމަނިކުފާނު ވިދާޅުވިއެވެ. މީގެ ކުރިން ވެސް ހައްގުތައް ހޯދިން ކަމަށާއި މިއަދުވެސް މިތިބީ ހައްގުުތައް ހޯދަން ނިކުމެވަޑައިގެން ކަމަށް ސޯލިހް ވިދާޅުވިއެވެ.

ކުރިމަތިން ފެންނަމުން މިދާ ވިލާގަނޑުން ފެންނަނީ ކުރިއަށް އޮތީ ވަރަށް ބަނަ، ބިރުވެރި، ނާމަން އަދި ދަތި އުނދަގޫ ދުވަސްތަކެއްގެ ގޮތުގައި ކަމަށް ރައީސް ސޯލިހް ސިފަފުޅު ކުރެއްވިއެވެ. މި ކަމާ މެދުގައި މިހާރުން މިހާރަށް މަސައްކަތްތަކެއް ކޮށް، އަވަސް މުސްތަގްބަލެއްގައި ފިޔަވަޅުތަކެއް އަޅަން ޖެހޭ ކަމަށާއި އެ ފިޔަވަޅުތައް ނާޅައިފި ނަމަ އަނިޔާވެރި ދުވަސްތަކަކާ ކުރިމަތިލާން ޖެހިދާނެ ކަމަށް ސޯލިހް ވިދާޅުވިއެވެ. އެގޮތުން އެމްޑީޕީން މިއަދު ނިކުމެ މި ތިބީ އަދުގެ ޒުވާނުންނާއި ދުވަސްވީ މީހުން މި އަނިޔާވެރިކަމުން ސަލާމަތް ކުރުމަށް ކަމަށް އެމަނިކުފާނު ވިދާޅުވިއެވެ.

ހަބަރު އިބްރާހިމް މުހައްމަދު ސޯލިހް އެމްޑީޕީ