ދިވެހިރާއްޖޭގައި ޓޫރިޒަމް ކުރިއެރުވުމަށްޓަކައި އުފެއްދި މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އަކީ އަވަސް މުސްތަގްބަލެއްގައި ފައިދާ ލިބޭނެ ކުންފުންޏެއް ނޫން ކަމަށް އޮޑިޓާ ޖެނެރަލް އޮފީހުން ބުނެފިއެވެ.
އެ އޮފީހުން މިހެން ބުނެފައި ވަނީ އެމްއައިޓީޑީސީން ހިންގާފައިވާ ޕްރޮޖެކްޓްތައް ކުރިޔަށް ގެންދެވިފައިވާ މިންވަރާއި އެ ޕްރޮޖްކްޓްތައް ކުރިޔަށް ގެންދިއުމަށް ކޮށްފައިވާ ހަރަދުތަކާއި ޕްރޮޖެކްޓްތައް ހިންގުމަށް ހަރުދަނާ އުސޫލުތަކެއް ހަދާފައިވޭތޯ ބެލުމަށާއި އަދި އެ އުސޫލުތަކާ އެއްގޮތަށް އެ ކުންފުނިން އަމަލުކޮށްފައިވާ މިންވަރު ބެލުމަށް ހިންގި އޮޑިޓަށް ފަހު އާނމްު ކުރި ރިޕޯޓްގައެވެ. އެ ރިޕޯޓްގައި ބަލާފައި ވަނީ އެ ކުންފުނި އުފެދުނު ތާރީހު 2016 ވަނަ އަހަރުން ފެށިގެން 2021 ވަނަ އަހަރުގެ ނިޔަލަށް ހިންގި ޕްރޮޖެކްޓްތަކުގެ މައްޗަށެވެ.
އެގޮތުން އެމްއައިޓީޑީސީން ކުރިޔަށް ގެންދިޔަ ލ. ބަރެސްދޫ އިންޓެގްރޭޓެޑް ރިސޯޓް އައިލެންޑް ޑިވެލޮޕްމަންޓް ޕްރޮޖެކްޓް އާއި ކ. ކާށިދޫގައި ކުރިޔަށް ގެންދިޔަ ކާށިދޫ ޓޫރިސްޓް ވިލެޖް ޕްރޮޖެކްޓް އަދި ކ. އަތޮޅުގެ 10 ފަޅެއް ހިއްކާ ތަރައްގީ ކުރުމަށް ކުރިޔަށް ގެންދިޔަ ޕްރޮޖެކްޓް ޕާމްގެ މަސައްކަތަށް އެ ރިޕޯޓްގައި އަލިއަޅުވާލާފައި ވެއެވެ. އެ ޕްރޮޖެކްޓަތަކަށް ޖުމުލަ 52.35 މިލިއަން ރުފިޔާ ހަރަދު ކޮށްފައިވާ ކަމަށާއި ނަމަވެސް އެއްވެސް ޕްރޮޖެކްޓެއްގެ މަސައްކަތް ނިމިފައިނުވާ ކަމަށް އޮޑިޓް ރިޕޯޓްގައި ބުނެފައި ވެއެވެ.
ލ. ބަރެސްދޫ އިންޓެގްރޭޓެޑް ރިސޯޓް އައިލެންޑް ޑިވެލޮޕްމަންޓް ޕްރޮޖެކްޓްއާ ގުޅިގެން އެ ކުންފުނިން 22,021,072 ރުފިޔާ ހަރަދުކޮށްފައި ވީ ނަމަވެސް އެ ޕްރޮޖެކްޓްގައި ހިމެނޭ ގެސްޓްހައުސް/ހޮޓެލް އަދި ފަތުރުވެރިންނަށް ބޭނުންވާ އެހެނިހެން ހިދުމަތްތައް ފޯރުކޮށްދިނުމަށް އިމާރާތް ކުރަންޖެހޭ އެއްވެސް އިމާރާތެއްގެ މަސައްކަތް ކުރިޔަށް ނުގެންދެވި ޕްރޮޖެކްޓް ހުއްޓުމަށް އައިސްފައިވާ ކަމަށް އޮޑިޓް ރިޕޯޓްގައި ބުނެފައި ވެއެވެ. ބަރެސްދޫ ޕްރޮޖެކްޓްގެ މަސައްކަތްތައް ކުރިޔަށް ގެންދިއުމަށް ހަވާލުކުރި ކުންފުންޏަށް އެޑްވާންސް ޕޭމަންޓްގެ ގޮތުގައި ދީފައިވާ 975,000 ޑޮލަރު އަނބުރާ އެމްއައިޓީޑީސީއަށް ލިބިފައިނުވާ ކަމަށާއި އެޑްވާންސް ފައިސާ ކޮންޓްރެކްޓަރަށް ދޫކޮށްފައި ވަނީ އެޑްވާންސް ޕޭމަންޓް ގެރެންޓީއެއް ނުހޯދައިކަމަށް އޮޑިޓް ރިޕޯޓްގައި ބުނެފައި ވެއެވެ.
ހަމައެއާއެކު ކ. ކާށިދޫގައި ކުރިޔަށް ގެންދިއަ ކާށިދޫ ޓޫރިސްޓް ވިލެޖްގެ މަސައްކަތަށް އެ ކުންފުނިން 26,721,446 ރުފިޔާ ހަރަދުކޮށްފައިވީ ނަމަވެސް ޕްރޮޖެކްޓްގެ މަސައްކަތް ނުނިމި މަސައްކަތް ހުއްޓުމަކަށް އައިސްފައިވާކަން އޮޑީޓް އޮފީހުން ބުނެއެވެ. މި ޕްރޮޖެކްޓްގެ މަސައްކަތް ފަށާފައި ވަނީ ޕްރޮޖެކްޓް ހިންގަން ހަމަޖެއްސި ބިމުގެ ރަޖިސްޓްރީ އެމްއައިޓީޑީސީއަށް ލިބުމުގެ ކުރިން ކަމަށާއި އެ ޕްރޮޖެކްޓް ކުރިޔަށް ގެންދިއުމަށް ކަނޑައެޅުނު ބިމަށް ދައްކަންޖެހޭ ލޭންޑް އިކުއިޒިޝަން ފީ އެމްއައިޓީޑީސީން ސަރުކާރަށް ދައްކާފައިނުވާތީ އެ ބިމުގެ ލީސް އެގްރީމަންޓްގައި ސޮއިކުރުމަށް ވަނީ ހުރަސް އެޅިފައެވެ. މި ޕްރޮޖެކްޓްގެ ފޭސް 1 ގައި ހިމެނޭ މަސައްކަތްތަކަށް ހަރަދު ކުރުމަށް ކަނޑައެޅި 1,656,346 ޑޮލަރުގެ ތެރެއިން 52 ޕަސެންޓް ފައިސާ ހަރަދުކޮށްފައިވީ ނަމަވެސް ފޭސް 1 ގައި ހިމެނޭ ޖުމުލަ 54 އެނދުގެ 3 ގެސްޓް ހޮޓަލާއި 1 މަލްޓި ޕާޕޯސް ބިލްޑިން އާއި 1 ވޭސްޓް މެނޭޖްމަންޓް ބިލްޑިން އާއި 1 މެއިންޓަނަންސް ބިލްޑިންގެ ތެރެއިން މަސައްކަތް ކުރިޔަށް ގެންގޮސްފައި ވަނީ ހަމައެކަނި 1 ގެސްޓް ހޮޓަލާއި އާއި ވޭސްޓް މެނޭޖްމަންޓް ބިލްޑިން އަދި މެއިންޓަނަންސް ބިލްޑިންގެ މަސައްކަތެވެ. އަދި މި ތިން އިމާރާތް ވެސް އެއްކޮށް ނިމިފައިނުވާކަމަށް އޮޑިޓް ރިޕޯޓްގައި ބުނެފައި ވެއެވެ.
"ޕްރޮޖެކްޓް ޕާމް" ގެ ނަމުގައި ކ. އަތޮޅު 10 ފަޅެއް ތަރައްގީ ކުރުމަށް ނިންމާ އޭގެތެރެއިން 3 ފަޅެއްގެ އެންވާރަމަންޓް އިންޕެކްޓް އެސެސްމަންޓް (އީއައިއޭ) ގެ މަސައްކަތް ކުރުމަށާއި އެ 3 ފަޅު ތަރައްގީ ކުރާނެ ގޮތުގެ މާސްޓާ ޕްލޭން ހެދުމަށް އެމްއައިޓީޑީސީން ސިންގަޕޫރުގެ ކުންފުންޏަކާ ހަވާލުކޮށް އެ ޕްރޮޖެކްޓަށް 3.6 މިލިއަން ރުފިޔާ ވަނީ ހަރަދުކޮށްފައެވެ، ނަމަވެސް އެ ފަޅުތަކަށް އެކުއިޒިޝަން ފީ ދައްކަންޖެހޭތީ އެކަމަކީ އެ ކުންފުންޏަށް ފީސިބަލް ކަމެއް ނޫންކަމަށް ނިންމާ އެ ޕްރޮޖެކްޓްގެ މަސައްކަތްތައް ވެސް ވަނީ ހުއްޓާލާފައި ކަމަށް އޮޑިޓް ރިޕޯޓްގައި ބުނެއެވެ.
އެ ކުންފުނީގެ މާލީ ހާލަތަށް ބަލާއިރު ސަރުކާރުގެ އިތުރު މާލީ އެހީތެރިކަން ނުލިބި އެކި ފަރާތްތަކަށް ދައްކަންޖެހިފައި ހުރި ފައިސާ ދެއްކިދާނެކަމަށް ނުބެލެވޭކަަމަށް އޮޑިޓާ ޖެނެރަލް އޮފީހުން ބުނެއެވެ. އަދި އެމްއައިޓީޑީސީން ކުރިޔަށް ގެންދިއުމަށް މަސައްކަތްކުރި އެއްވެސް ޕްރޮޖެކްޓެއް ނިމުމަކަށް އައިސްފައިނުވުމާ އެކު ފަށާފައިވާ އެއްވެސް ޕްރޮޖެކްޓަކުން އަވަސް މުސްތަގްބަލެއްގައި ކުންފުންޏަށް އާމްދަނީ ލިބޭނެ ކަމަށް ނުފެންނަ ކަމަށް ވެސް އޮޑިޓާ ޖެނެރަލް އޮފީހުން ބުނެއެވެ. އަދި އެ ކުންފުންޏަކީ ދެމެހެއްޓެނިވި ގޮތެއްގައި ހިންގިދާނެ ންފުންޏެއް ކަމަށް ނުބެލެވޭ ކަމަށް ވެސް ބުނެފައި ވެއެވެ.
