އޮންލައިންކޮށް ވިޔަފާރި ކުރާއިރު ހާއްސަ ސަމާލުކަމެއް ދިނުމަށް ފުލުހުން އަނެއްކާވެސް އެދެފިއެވެ.
ފުލުހުން ބުނި ގޮތުގައި އޮންލައިންކޮށް މުދާ ގަތުމަށް ފައިސާ ދެއްކުމުން މުދާ ޑެލިވަރީ ނުކޮށްދޭ މައްސަލަތައް މިހާރަކަށް އައިސް އިތުރުވަމުންދާ ކަމަށެވެ.
ހާއްސަކޮށް ފޭސްބުކްގައި ހިންގާ "ހޯމް އާޓް ފަރުނީޗާ" ޕޭޖާ ގުޅޭ ފްރޯޑް މައްސަލަތައް ގިނަ އަދަދަކަށް ހުށަހެޅެމުންދާކަމަށް ފުލުހުން ބުނެފައި ވެއެވެ. އެހެންކަމުން، އޮންލައިންކޮށް މުދާ ގަންނައިރު މުދާ އަތަށް ލިބުމުން ނޫނީ ފައިސާ ނުދެއްކެވުމަށާއި "ހޯމް އާޓް ފަރުނީޗާ" ޕޭޖުން މުދާ ގަތުމުގައި ވަރަށް ބޮޑަށް ސަމާލުވުމަށާއި އޮންލައިންކޮށް ވިޔަފާރިކުރާނަމަ އެ ވިޔަފާރިއެއްގެ ސައްހަކަން ކަށަވަރުކުރުމަށް ފުލުހުން ވަނީ އިލްތިމާސް ކޮށްފައެވެ.
އަދި އެފަދަ ފްރޯޑް މައްސަލައެއްގެ ޝިކާރައަކަށް ވެއްޖެނަމަ، ލަސްނުކޮށް ފުލުހުންނަށް ރިޕޯޓު ކުރުމަށް ވެސް އެ އިދާރާއިން ވަނީ އެދިފައެވެ.
މަކަރާއި ހީލަތުން ފައިސާ ހޯދުމަކީ ފަހަކަށް އައިސް ރާއްޖޭގައި އިތުރުވަމުންދާ މައްސަލައެއްކަން ފާހަގަކޮށްލެވެއެވެ. އެގޮތުން އެކި ސޯޝަލް މީޑިއާގެ މަންސަތައް ހެކްކުރުމުގެ އިތުރުން އެކި ވިޔަފާރީގެ ނަންނަމުގައި ވެސް މިފަދަ ކަންކަން ކުރަމުން ދެއެވެ.
އަދި ހަމައެހެންމެ އޮޅުވާލައިގެން ގޭގެއަށް ގެންގޮސް ފޭރުމާއި ވައްކަން ކުރާ މައްސަލަތައް ވެސް އިތުރުވަމުންދާކަން ފާހަގަކޮށްލެވެއެވެ.
