ސީރިއާގައި ގާއިމުވެ ތިބޭ އެމެރިކާގެ ފައުޖުތަކަށް ނުރައްކަލެއް އޮތް ކަމަށް ބުނެ، ސީރިއާގެ އަސްކަރީ މަގާމަކަށް ހަމަލާދީއެވެ.
ޕެންޓަގަންގެ ތަރުޖަމާން ޕެޓް ރައިޑާ އާ ހަވާލާދީ ބޭރުގެ ނޫސްތަކުން ބުނީ، ސީރިއާގެ އިރުމަތީ ބިތުގެ ސަރަހައްދެއްގައި ގާއިމު ކޮށްފައި ހުރި ރޮކެޓް ލޯންޗަރުތަކަކާއި ޓޭންކަކަށް ހަމަލާދީ އެތަކެތި ހަލާކު ކޮށްލާފައި ވާ ކަމަށެވެ.
އެ ހާދިސާގައި މީހަކު މަރުވި ކަމެއް ނުވަތަ ޒަހަމްވި ކަމެއް ސާފެއް ނުވެއެވެ.
އެމެރިކާއިން ސީރިއާގެ އަސްކަރީ މަގާމުތަކަށް އަމާޒުކޮށް ހަމަލާ މިދިނީ ސަރުކާރާ އިދިކޮޅު ފަރާތްތަކުން އުތުރު ބިތުގެ އެލެއްޕޯ ހިފާ ވެރިރަށް ދިމިޝްގާ ދިމާއަށް ކުރިއަރަމުން އަންނަނިކޮށެވެ.
ސީރިއާގެ ސަރުކާރާ އިދިކޮޅު ފަރާތްތަކުން ސަރުކާރު ވައްޓާލަން ކުރަމުން ދާ ހަނގުރާމައިގައި އެފަރާތްތަކަށް ނުސީދާ ގޮތުން މަދަދު ދޭ އެއްބަޔަކީ އެމެރިކާއެވެ. ސީރިއާގެ ސަރުކާރުގެ ސިފައިންނަށް އެހީތެރިވެދީ މަދަދު ދޭ ބަޔަކީ ރަޝިއާ އާއި އީރާނެވެ.
އެމެރިކާގެ ބޭސް އަކާ ކައިރިއަށް ރޮކެޓެއް ވެއްޓުނު ކަމަށާއި އެއީ އެމެރިކާ ސިފައިންނަށް ހުރި ނުރައްކަލެއް ކަމަށް ބުނެ އެމެރިކާއިން ދިން މިހަމަލާގެ އަސްލު ބޭނުމަކީ ސަރުކާރު ސިފައިން ބަލި ކުރުމަށް އިދިކޮޅު ފަރާތްތަކުން ދެމުން ގެންދާ ހަމަލާތަކަށް އެހީތެރިވެ ދިނުން ކަމަށް މަޝްރަހު ދިރާސާ ކުރާ ފަރާތްތަކުން ބުނެއެވެ.
ޕެންޓަގަމުން އިތުރަށް ބުނީ، ރޮކެޓް ލޯންޗަރުތައް ބޭނުން ކުރަމުން ދިޔައީ ސީދާ ކޮންބައެއްކަން ސާފުނުވި ނަމަވެސް އެސަރަހައްދަކީ އީރާނުގެ ފައުޖުތަކާއި ސީރިއާގެ ސަރުކާރު ސިފައިން ހަރަކާތްތެރިވާ ސަރަހައްދެއް ކަމަށެވެ.
ސީރިއާ ސަރުކާރު ވައްޓާލަން ހަނގުރާމަ ކުރަނީ ކުރުދީން ބާރު ހިންގާ ސީރިއާގެ ފައުޖެކެވެ. މިމީހުނަށް ވައިގެ މަގުން އެމެރިކާގެ ފައުޖުތަކުން މަދަދު ދޭ އިރު، ސީރިއާގެ ސަރުކާރު ސިފައިންނަށް ވައިގެ މަގުން މަދަދު ދިނުމުގައި ރަޝިއާގެ ފައުޖުތައް ދަނީ ހަރަކާތްތެރިވަމުންނެވެ.
ސީރިއާގައި ވަރުގަދަ ދާހިލީ ހަނގުރާމައެއް ހިނގަމުން ދާ އިރު އެ ގައުމުގެ ތެރޭގައި އެމެރިކާ، ރަޝިއާ، އީރާން، ތުރުކީގެ ފައުޖުތައް ސީރިއާގެ އެކިއެކި ޖަމާއަތްތަކާ ގުޅިގެން ހަރަކާތްތެރިވަމުން ދެއެވެ. އެގައުމުތަކުން ސީރިއާގެ ތެރޭގައި ހަރަކާތްތެރިވާ ސަބަބުތަކުގެ ތެރޭގައި ސީރިއާގައި ހުރި ގުދުރަތީ މުއްސަނދިކަމުން މަންފާ ހޯދުމާއި، މެދުއިރުމަތީގައި ގާއިމުވެ ތިބެ ވިޔަފާރީގެ ބޮޑެތި މުއާމަލާތްތައް ކުރުން ހިމެނެއެވެ.
