ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ފަންޑުކޮށްގެން ވ. ރަކީދޫގައި ގާއިމުކޮށްފައިވާ ސޯލާ ހައިބްރިޑް ސިސްޓަމާއެކު، އިއާދަކުރަނިވި ހަކަތައިން ބޮޑު ކުރިއެރުމެއް ލިބިފައިވާ ކަމަށް އެ ކުންފުނީގެ އެމްޑީ، ހުސައިން ފަހުމީ ވިދާޅުވެއްޖެއެވެ.
އެކްސްގައި ހިއްސާ ކުރެއްވި ޕޯސްޓެއްގައި ފަހުމީ ވިދާޅުވީ ރަކީދޫއަކީ އިއާދަކުރަނިވި ހަކަތައިގައި ކުރިއަރަމުން އަންނަ ރަށެއް ކަމަށެވެ.
އެގޮތުން އެރަށުގައި ކަރަންޓު އުފެއްދުމަށް ހައިބްރިޑް ޕީވީ-ބީއީއެސްއެސް-ޑީޖީ ސިސްޓަމެއް ގާއިމްކޮށް އެ ސިސްޓަމުން ސޯލާއިން ކަރަންޓު އުފެއްދުމުގެ އިތުރުން، ބެޓެރީގައި ހަކަތަ ރައްކާ ކުރުމުގެ ގާބިލްކަން ލިބިފައިވާ ކަމަށް ފަހުމީ ވިދާޅުވިއެވެ.
އެއާއެކު އެ ރަށުގައި ޖަނަރޭޓަރު ހިންގަން ޖެހެނީ އެންމެ 2 ގަޑި އިރަށްކަން ފާހަގަ ކުރައްވާ ފަހުމީ އިތުރަށް ވިދާޅުވީ ބާކީ ހަކަތަ އުފައްދަނީ ސޯލާ އަދި ބެޓެރީ ސްޓޯރޭޖް ބޭނުންކޮށްގެން ކަމަށެވެ.
ރަކީދޫގައި މީގެ ކުރިން 2016 ވަނަ އަހަރު އޭޑީބީގެ އެހީގައި ފެށި މަޝްރޫއެއްގައި ވެސް ވަނީ ސޯލާ ހައިބްރިޑް ސިސްޓަމެއް ގާއިމުކޮށްފައެވެ. ނަމަވެސް، ފަހުން އެ ސިސްޓަމް ވަނީ ބޭނުން ނުކުރެވޭ ވަރަށް ހަލާކުވެފައެވެ.
މުޅި ރާއްޖޭގައި ބޭނުންކުރާ ހަކަތައިގެ 33 ޕަސެންޓަކީ އިއާދަކުރަނިވި ހަކަތައަށް ހެދުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރަށް ފަހުމީ ވަނީ ޝުކުރު އަދާ ކުރައްވާފައެވެ.
