މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން ކަރަންޓު ކޭބަލް ބުރިވުން ފަދަ ކަމެއް ދިމާވެއްޖެ ހާލަތެއްގައި، އެ ފަރާތެއް ޒިންމާދާރު ކުރުވައި، މައްސަލަ ހައްލުކޮށް އަލުން ހިދުމަތް ދިނުމަށް ހިނގާ ހުރިހާ ހަރަދެއް އެ ފަރާތެއްގެ އަތުން ނެގުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ނިންމައިފިއެވެ.
ސްޓެލްކޯއިން ބުނި ގޮތުގައި، އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް މަގު ކޮނުމުގެ އެކި މަސައްކަތްތަކުގެ ތެރެއިން ގެއްލުންވެ، ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ތަކުލީފުތަކާއި ދަތިތަކާ ކުރިމަތިވަމުންދެއެވެ. މިގޮތުން މި ހަފްތާ ތެރޭގައިވެސް ހުޅުމާލޭގެ ފުރަތަމަ ފިޔަވަހީގެ ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ އިމާރާތްކުރުމުގެ މަސައްކަތެއްގެ ތެރެއިން ބިން ކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެ ކަރަންޓު ކެނޑުމުގެ ހާދިސާއެއް ވަނީ ހިނގާފައެވެ.
މިފަދަ ހާދިސާތައް ދުވަހެއް ދުވަހަކަށް އިތުރުވަމުންދާތީ، ސްޓެލްކޯއިން ނިންމާފައިވަނީ އިހުމާލުވާ ފަރާތްތައް ޒިންމާދާރުކުރުވައި، އަލުން ހިދުމަތް ދިނުމަށް ހިނގާ ހަރަދު އެ ފަރާތްތަކުގެ އަތުން އަތުލުމަށެވެ. އެ ކުންފުނިން ފާހަގަކުރި ގޮތުގައި މިއީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމުންނަށް ދިމާވާ ދަތިތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމި ނިންމުމެކެވެ.
އެހެންކަމުން، އިމާރާތްކުރުމާއި މަގު ކޮނުމުގެ އެންމެހާ މަސައްކަތްތައް ކުރިއަށްގެންދާ ހުރިހާ ފަރާތްތަކުންވެސް، ބިމުގެ އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން ޒިންމާދާރުކަމާއެކު މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
