ޕާޓީ ބަދަލުކޮށްފިނަމަ ގޮނޑި ގެއްލޭ ގާނޫނަށް (އޭންޓި ޑިފެކްޝަން ގާނޫނަށް) ބަދަލުތަކެއް ގެނައުމަށް ހައިކޯޓަށް ހުށަހަޅައިފިއެވެ.
މިކަމާ ގުޅިގެން "ދަ ޕްރެސް"އަށް މައުލޫމާތު ދެއްވަމުން ހައިކޯޓުގެ އިންފޮމޭޝަން އޮފިސަރު އަމީން ފައިސަލް ވިދާޅުވީ އަމިއްލަ ފަރާތަކުން އެފަދަ ދުސްތޫރީ މައްސަލައެއް މިއަދު ހުށަހަޅާފައިވާ ކަމަށެވެ.
އަމީން ވިދާޅުވީ މައްސަލަ ބަލައިގަތުމާމެދު އަދި ވަކި ގޮތެއް ނިންމާފައި ނުވާ ކަމަށާއި މައްސަލަ ހުށަހެޅި ފަރާތުން ހުށަހަޅާފައިވާ ލިޔެކިޔުންތައް ބެލުމުގެ މަސައްކަތް ކުރަމުންދާ ކަމަށެވެ.
އެންޓި-ޑިފެކްޝަން ގާނޫނަކީ ވަކި ސިޔާސީ ޕާޓީއެއްގެ ޓިކެޓްގައި ވާދަކޮށްގެން ރައްޔިތުންގެ މަޖިލީހަށާއި ކައުންސިލްތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް އިންތިހާބުވުމަށްފަހު، އެ އިންތިހާބުވި ދައުރުގެ ތެރޭގައި އިންތިހާބުވި ޕާޓީގެ މެންބަރުކަމުން ވަކިވެއްޖެނަމަ ނުވަތަ އަމިއްލަ ގޮތުން އިންތިހާބުވެފައިވާ މެންބަރަކު ސިޔާސީ ޕާޓީއެއްގެ މެންބަރަކަށް ވެއްޖެނަމަ އެފަދަ މެންބަރެއްގެ ގޮނޑިއާމެދު އަމަލުކުރާނޭ ގޮތް ކަނޑައެޅުމަށް އެކުލަވާލާފައިވާ ގާނޫނެކެވެ. އެފަދައިން ގޮނޑި ހުސްވާ ހާލަތްތަކުގައި ބައި-އިލެކްޝަން ބޭއްވުމާގުޅޭ އުސޫލުތަކާއި އިޖުރާއަތުތައް މި ގާނޫނުގައި ބަޔާންކޮށްފައިވެއެވެ.
ގަވާއިދުގައި ބަޔާންކޮށްފައިވާ ގޮތުގައި މަގާމުން އިސްތިއުފާ ދޭންޖެހޭ ހާލަތްތައް:
- އިންތިހާބުވި ޕާޓީގެ މެންބަރަކަމުން އަމިއްލައަށް ވަކިވާން ހުށަހަޅައި އެކަން އިލެކްޝަންސް ކޮމިޝަންގައި ދަފްތަރުވުން
- އިންތިހާބުވި ޕާޓީ ނޫން އެހެން ޕާޓީއެއްގެ މެންބަރެއްގެ ގޮތުގައި އިލެކްޝަންސް ކޮމިޝަނުގައި ދަފްތަރުވުން
- އަމިއްލަ ގޮތުން އިންތިހާބުވި މެންބަރަކު އެ މީހަކު އިންތިހާބުވި ދައުރުގެ ތެރޭގައި އެއްވެސް ސިޔާސީ ޕާޓީއެއްގެ މެންބަރަކަށްވުން
އެ ގާނޫނުގައި ބުނާ ގޮތުން މެންބަރަކު އިންތިހާބުވި ޕާޓީން އަމިއްލައަށް ވަކިވުން ނުވަތަ އެހެން ޕާޓީއަކަށް ބަދަލުވުން ނުވަތަ އަމިއްލަ ގޮތުން އިންތިހާބުވި މެންބަރަކު އެއްވެސް ސިޔާސީ ޕާޓީއެއްގެ މެންބަރަކަށްވާ ހާލަތުގައި އެކަން 7 ދުވަހުގެ ތެރޭގައި އިލެކްޝަންސް ކޮމިޝަނުން ރައްޔިތުންގެ މަޖިލީހަށް އަންގަން ޖެހެނޭއެވެ. އަދި އެކަން މަޖިލީހަށް އަންގާ ދުވަހުން ފެށިގެން އެ މެންބަރަކު މަޖިލީހުގެ މެންބަރުކަމުން އިސްތިއުފާ ދޭން ޖެހޭނެއެވެ.
