ކުރީގެ ނައިބު ރައީސް އަބްދުﷲ ޖިހާދުގެ މައްސަލައިގެ އިސްތިއުނާފު ބަލައިނުގަންނަން ހައިކޯޓުން ނިންމި ނިންމުން މުރާޖައާ ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ހައިކޯޓަށް ހުށަހަޅައިފިއެވެ.
މި މައްސަލަ ބަލައިނުގަތުމަށް ހައިކޯޓުން ނިންމާފައި ވަނީ އިސްތިއުނާފު ހުށަހެޅުމަށް ހައިކޯޓުން ދިން 15 ދުވަހުގެ މުއްދަތު ފާއިތުވި ފަހުން މައްސަލަ ހުށަހަޅާފައިވާތީ ކަމަށް ހައިކޯޓުން ވަނީ ބުނެފައެވެ.
ޕީޖީ އޮފީހުން ބުނީ ޖިހާދުގެ މައްޗަށް ކުރިމިނަލް ކޯޓަށް ހުށަހެޅި ރައްޔިތުންނަށް ނުވަތަ ދައުލަތަށް ފައިދާއެއްވާން އޮތް ކަމެއްގައި އެނޫން ގޮތަކަށް އަމަލުކުރުމުގެ މައްސަލަ ބެލޭނެ ތަނެއް ނެތްކަމަށް އެކޯޓުން ކަނޑައެޅުމާ ގުޅިގެން، އެ މައްސަލަ އިސްތިއުނާފުކުރުމަށް މިދިޔަ އޮގަސްޓް މަހުގެ 11 ވަނަ ދުވަހު ހައިކޯޓަށް ހުށަހަޅާފައިވާނެ ކަމަށެވެ.
މައްސަލަ ހައިކޯޓަށް ހުށަހެޅުމުން ކޯޓަށް ހާޒިރުވުމުގެ އަމުރު ޖިހާދަށް ރައްދު ނުކުރެވޭ ކަމަށް ބަޔާންކޮށް، އޭނާ ކޯޓަށް ހާޒިރުކުރެވޭނެ އިންތިޒާމު ހަމަޖެއްސުމަށްފަހު، 15 ދުވަހުގެ ތެރޭގައި އަލުން މައްސަލަ ހުށަހެޅުމަށް ހައިކޯޓުން ވަނީ ފުރުސަތު ދީފައެވެ.
އެ މުއްދަތުގައި ދިވެހި ފުލުހުންގެ ހިދުމަތް މެދުވެރިކޮށް ޖިހާދު ހުރިތަނެއް ސާފުކުރި އިރު، އޭނާ ރާއްޖެއިން ބޭރަށް ގޮސްފައިވާކަމަށް މައޫލޫމާތުދީފައިވާ ކަމަށް ޕީޖީ އޮފީހުން ބުނެއެވެ. އެހެންކަމުން ކޯޓުން ދިން މުއްދަތުގައި މައްސަލަ އަލުން ހުށަހެޅުމަށް ހުރަހެއް ކުރިމަތިވެފައިވާކަން ބަޔާންކޮށް، މުއްދަތު އިތުރުކޮށްދިނުމަށް މި މަހުގެ 3 ވަނަ ދުވަހު ހައިކޯޓުގައި އެދިފައިވާނެ ކަމަށް ހައިކޯޓުން ވަނީ ބުނެފައެވެ.
ޖިހާދު އެނބުރި ރާއްޖެ އައިސްފައިވާކަމަށް މި މަހުގެ 14 ވަނަ ދުވަހު ގައި ދިވެހި ފުލުހުންގެ ހިދުމަތުން ޕީޖީ އޮފީހަށް މައުލޫމާތު ދިނުމާއެކު، ޖެހިގެން އައި (ދުވަހު އޮކްޓޫބަރު 15)ގައި މައްސަލަ އަލުން ހައިކޯޓަށް ހުށަހަޅާފައިވާނެކަން ޕީޖީ އޮފީހުން ވަނީ ފާހަގަކޮށްފައެވެ. ނަމަވެސް އެ ކޯޓުގެ ރަޖިސްޓާގެ ނިންމުމުން މައްސަލަ ބަލައިނުގަތުމަށް މި މަހުގެ 27 ވަނަ ދުވަހު ވަނީ ނިންމާފައެވެ.
ޕީޖީ އޮފީހުން ބުނީ ހައިކޯޓުގެ ރަޖިސްޓްރާގެ ނިންމެވުމާމެދު އެ އޮފީހުން ހިތްހަމަ ނުޖެހޭތީއާއި ރަޖިސްޓްރާގެ ނިންމެވުން ކޯޓުތަކުގެ ގާނޫނުގެ 42 ވަނަ މާއްދާއާއި، ހައިކޯޓުގެ ގަވާއިދުގެ 29 ވަނަ މާއްދާއާ ފުށޫއަރާކަމަށް ފެންނާތީ، އެ ނިންމެވުން މުރާޖައާކޮށްދެއްވުން ދިވެހިރާއްޖޭގެ ހައިކޯޓުގެ ފަނޑިޔާރުންގެ މަޖިލީހަށް މިއަދު ހުށަހަޅާފައިވާނެ ކަމަށެވެ.
