ހުޅުމާލޭގައި އިމާރާތް ކުރަމުންދާ ކޭ ޕާކް އެޕާޓްމެންޓްތައް މަކަރާއި ހީލަތުން ވިއްކާފައިވާ ކަމަށް ތުހުމަތުކުރެވޭ މައްސަލައިގައި އެ ކުންފުނީގެ އެއް ހިއްސާދާރު ކަމަށްވާ ހަސަން މަމްދޫހު (މަންޑޭ) ގެ ވަކީލެއްގެ ގޮތުގައި އެންވާރަމަންޓް މިނިސްޓްރީ ޑެޕިއުޓީ މިނިސްޓަރު މުހައްމަދު ރާޣިބު އަހުމަދު ވަކާލާތު ކުރުމުގައި ހުރަހެއް ނެތް ކަމަށް ކްރިމިނަލް ކޯޓުން ބުނެފިއެވެ.
ކްރިމިނަލް ކޯޓުން މިފަދައިން ނިންމާފައިވާއިރު ނިމިދިޔަ ހަފްތާގައި ހައި ކޯޓުން ވަނީ ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ނިންމާ އެކަން ރާޣިބަށް އަންގާފައެވެ. އެފަހަރު އޭނާ ވަކާލާތު ކޮށްފައި ވަނީ ޖިންސީ ގޯނާ ކުރި މީހެއްގެ ދިފާއުގައެވެ. ނަމަވެސް ރައީސް އައްޔަންކުރައްވާ ސިޔާސީ މަގާމެއްގައި ހުންނަވައިގެން ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައިކޯޓުން ނިންމީ ހައިކޯޓުގެ ތިން ފަނޑިޔާރުންގެ ބެންޗުގެ އިއްތިފާގުންނެވެ.
ނަމަވެސް ކްރިމިނަލް ކޯޓުގައި މިއަދު ބޭއްވި އަޑުއެހުމުގައި މަމްދޫހުގެ ދިފާއީ ވަކީލެއްގެ ގޮތުން ރާޣިބް ހުންނެވުމުން ދައުލަތުން ވަނީ އެކަމާ ދެކޮޅު ހަދާފައެވެ. އަދި ސަރުކާރުގެ ސިޔާސީ މަގާމެއްގައި ހުންނެވި ބޭފުޅަކު ވަކާލާތު ކުރުމަކީ މަސްލަހަތު ފުށުއަރާ ކަމެއް ކަމަށާއި އަދި އެއީ ވަކީލުން ސުލޫކާ ވެސް ޚިލާފް ކަމެއް ކަމަށް ދައުލަތުން ވަނީ ބުނެފައެވެ. އަދި ހައި ކޯޓުންވެސް އެފަދައިން ނިންމާފައިވާ ކަން ދައުލަތުން ވަނީ ފާހަގަކޮށްފައެވެ.
ނަމަވެސް ކްރިމިނަލް ކޯޓުގައި އެ މައްސަލަ ބައްލަވާ ގާޒީ އަލީ ނަދީމް ވިދާޅުވީީ، އެ މީހަކު އިިހްތިޔާރުކުރާ ވަކީލަކު ހަމަޖެއްސުމަކީ ކޮންމެ މީހެއްގެ ވެސް ހައްގެއް ކަމަށެވެ. އަދި ހައި ކޯޓުން އެފަދައިން ނިންމާފައި އޮތް ނަމަވެސް ރާޣިބްގެ އެ އަމަލަކީ ސުލޫކާ ޚިލާފް އަމަލެއްކަން ނުވަތަ ނޫންކަން ކޯޓަށް ނުނިންމޭނެ ކަމަށާއި އެކަން ކުރެވޭނީ ބާ ކައުންސިލަށް ކަމަށް ގާޒީ ވަނީ ވިދާޅުވެފައެވެ. އަދި، ރާޣިބަށް އެ މައްސަލާގައި ދިފާއީ ވަކީލެއްގެ ގޮތުގައި ވަކާލާތު ކުރެވޭނެ ކަމަށް ގާޒީ ވަނީ ނިންމަވާފައެވެ.
ރާޣިބު ވަނީ 2019 ވަނަ އަހަރު އެކި ކޯޓުތަކުގެ މުވައްޒަފުންނަށް ޖިންސީ ފުރައްސާރަ ކުރި ކަމަށް ތުހުމަތު ކުރެވޭ މައްސަލަތަކެއްގައި ސަސްޕެންޑްވެސް ކޮށްފައެވެ. އޭރު ރާޣިބުއާ ދެކޮޅަށް މައްސަލަ ހުށަހަޅާފައި ވަނީ އަންހެން މުވައްޒަފުންނާ މާ ބޮޑަށް ގައިގޯޅިވާ ކަމަށް ތުހުމަތުކޮށެވެ.
އެއް އެޕާޓްމަންޓް އެތައް ބަޔަކަށް ވިއްކާ ގިނަ އަދަދެއްގެ ފައިސާ ނަގާފައި ވާ މައްސަލަ ފެންމަތިވީ، މައި ހިއްސާދާރު އެ މައްސަލައިގައި ކަމާބެހެ އިދާރާތަކަށް ހިގަން ފެށުމުންނެވެ. އަދި އެ މައްސަލައާ ގުޅޭ ބަޔާނެއް ވެސް ހަމްބޯ ކުންފުނިން ނެރެ، މަމްދޫހުގެ ފަރާތުން ކޮށްފައި ހުރި މުއާމަލާތްތަކާއި، އެޕާޓްމަންޓް ގަތް ފަރާތްތަކުން މައުލޫމާތު ހިއްސާ ކުރުމަށް ލޯ ކްރާފްޓް ކިޔާ ލޯފާމެއް އައްޔަން ކޮށްފައި ވެެއެވެ.
ގިނަ ބައެއްގެ އަތުން މަންޑޭ ފައިސާ ނެގި ކަމަށް ތުހުމަތުކޮށް ފުލުހުންނަށް މައްސަލަ ހުށަހެޅީ ހަންބޯ ކުންފުނީގެ އަނެއް ހިއްސާދާރުގެ ފަރާތުންނެވެ. ކޭޕާކް މައްސަލައިގައި މަންޑޭގެ މައްޗަށް 104 ދައުވާއެއް ކުރުމަށް ދައުލަތުން ވަނީ ހުށަހަޅާފައެވެ. އޭގެތެރޭގައި ހިމެނެނީ މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުމުގެ ކުށުގެ 3 ދައުވާ، ޓެކުމުގެ ކުށުގެ 50 ދައުވާ، އޮޅުވާލުމުގެ އަމަލެއް ކުރުމުގެ ކުށުގެ 50 ދައުވާގެ އިތުރުން މަނީ ލޯންޑްރިން ކުށުގެ 1 ދައުވާއެވެ.
އެ މައްސަލާގައި މަންޑޭ ހައްޔަރުކޮށް، އަދި އޭނާގެ ގޭގައި ހުރި އަގޮބޮޑެތި ސާމާނުތަކާއި ދަބަހާއި ސެންޓު ފަދަ ތަކެތި ވެސް ވަނީ ހިފަހައްޓާފައެވެ. އެ ތަކެތީގެ އަގު 7 މިލިއަން ރުފިޔާއަށް އަރަ އެވެ. މިތަކެތި އަނބުރާ ހޯދަން މަމްދޫހު ހައި ކޯޓާ ހިސާބަށް ދިޔަ ނަމަވެސް ހައި ކޯޓުން ވެސް ނިންމީ އެފަދަ އަމުރެއް ދެވެން ނެތް ކަމަށެވެ.
