ގައުމީ އެއާލައިން، މޯލްޑިވިއަން އިން ވައިޑް ބޮޑީ އެއާކްރާފްޓް ގެނެސް އަންނަ އަހަރު ޖެނުއަރީ މަހުގެ ކުރީކޮޅު ދަތުރުތައް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވިދާޅުވީ ޖެނުއަރީގައި ފުރަތަމަ ވައިޑް ބޮޑީ އެއާކްރާފްޓު ގެނެސް އުދުހެން ފަށާނެކަމަށާއި އެކަން ފުޅާކުރަމުން ގޮސް އަންނަ އަހަރުގެ ތެރޭގައި ޗައިނާ އާއި ޔޫރަޕްގެ މަންޒިލްތަކަށް މޯލްޑިވިއަންގެ ވައިޑް ބޮޑީ އެއާކްރާފްޓުގެ ދަތުރުތައް ފަށާނެ ކަމަށެވެ.
ދުރު މަންޒިލްތަކަށް ސީދާ ދަތުރު ކުރެވޭ ގޮތަށް ފަރުމާކޮށްފައިވާ ވައިޑް ބޮޑީ އެއާކްރާފްޓަކީ 275 ފަސިންޖަރުންގެ ޖާގައިގެ ބޯޓެކެވެ.
ގައުމީ އެއާލައިންގެ އޮޕަރޭޝަންތައް ފުޅާކުރުމަށް ވައިޑް ބޮޑީ މަތިންދާބޯޓެއް ގެނައުމުގެ އެއްބަސްވުމުގައި މިއަހަރު ޖުލައި މަހުގެ 26 ވަނަ ދުވަހު ސޮއިކޮށްފައިވާއިރު ރާއްޖެއަށް ގެނައުމަށް ހަމަޖެހިފައިވަނީ އެއާބަސް އޭ 330-200ގެ ވައިޑް-ބޮޑީ މަތިންދާބޯޓުތަކެވެ. މި މަތިންދާ ބޯޓުތަކުގައި ސީދާ 13،000 ކިލޯމީޓަރުގެ ދުރުމިނެއް ދަތުރުކުރުމުގެ ގާބިލްކަން ލިބިފައިވާއިރު މިއީ ހަނި ބޮޑީ މަތިންދާ ބޯޓަކަށްވުރެ ތިންގުނަ ބޮޑު މަތިންދާ ބޯޓެކެވެ.
މީގެ ކުރިން މީޑިއާ ދިން އިންޓަވިއުއެއްގައި ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ ވައިޑް ބޮޑީ މަތިންދާބޯޓުތައް ހިމެނުމަކީ މޯލްޑިވިއަންގެ ބައިލްއަގްވާމީ ދަތުރުތައް ފުޅާކުރުމަށް ހިފާފައިވާ އަމާޒުގެ މުހިއްމު ހިއްސާއެއްކަމުގައެވެ. މޯލްޑިވިއަން އެއާލައިނަށް ވައިޑް-ބޮޑީ ދެ އެއާކްރާފްޓް ގެންނަން ހަމަޖެހިފައިވާކަން ހާމަކޮށް އަމީން ވިދާޅުވީ އެ ބޯޓުތަކާ އެކު އާ 7 މަންޒިލަކަށް ދަތުރުތައް ފަށާނެކަމަށެވެ.
