ޓެރަރިޒަމްގެ ދެ މައްސަލައެއްގައި ބަންދުގައި ހުރި މުހައްމަދު އަމީނުގެ މައްޗަށް ކުރި ދެ ދައުވާ ވެސް ސާބިތުވެ 27 އަހަރަށް ޖަލަށްލި މައްސަލައިގެ އަޑުއެހުންތައް ސިއްރު ނުކޮށް ކުރިއަށް ގެންދަން ހައި ކޯޓުން މިއަދު ނިންމައިފިއެވެ.
ޏ. ފުވައްމުލަކު ކަރިއްޔާވިލާ މުހައްމަދު އަމީންގެ މައްޗަށް ދައުލަތުން ދައުވާކުރީ ޓެރަރިސްޓް ޖަމާއަތެއްގައި ބައިވެރިވުމުގެ ދައުވާގެ އިތުރުން ޓެރަރިޒަމްގެ އަމަލެއް ރޭވުމުގެ ދައުވާ އެވެ. އަމީނަކީ އައިއެސް ޖަމާއަތާއި ގުޅިގެން، ދިވެހިން އަފްޣާނިސްތާނުގެ ހުރާސާނަށް ދިވެހިން ފޮނުވި މީހެއް ކަމަށް ތުހުމަތު ކޮށް އޭނާ ހައްޔަރު ކޮށް ބަންދުކޮށްފައި ވަނީ 2021 ވަނަ އަހަރުއެވެ.
އަމީންގެ މައްޗަށް ކުރި ދެ ދައުވާ ވެސް ސާބިތުވެ، އޭނާ 27 އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފައިވަނީ މިދިޔަ އަހަރުގެ ނޮވެމްބަރު 8 ވަނަ ދުވަހުއެވެ. އެ މައްސަލައިގެ އަޑުއެހުންތައް ކްރިމިނަލް ކޯޓުން ކުރިއަށް ގެންދިޔައީ ސިއްރުކޮށްގެންނެވެ.
އަމީންގެ މައްޗަށް އުފުލި ޓެރަރިޒަމްގެ ދެ ދައުވާ ސާބިތުވާ ކަމަށް ކަނޑައަޅާ، ކްރިމިނަލް ކޯޓުން އިއްވާފައިވާ ޖަލު ހުކުމް އަމީންގެ ފަރާތުން ވަނީ އިސްތިއުނާފްކޮށްފައެވެ. މި މައްސަލަ އިސްތިއުނާފް ކުރުމުން މިއަދު ބޭއްވި އަޑުއެހުމުގައި އަމީންގެ ވަކީލް ހަމްޒާ ލަތީފް ވިދާޅުވީ އެ މައްސަލަ އާންމުކޮށް ހުޅުވާލައިގެން ކުރިއަށް ގެންގޮސްފި ނަމަ ގައުމީ ސަލާމަތާ ގުޅޭ އިންޓެލިޖެންސް ބައެއް މައުލޫމާތު ހާމަވެދާނެ ކަމަށާއި އަދި އަޑުއެހުންތައް އާންމުކޮށް ހުޅުވާލުމުން އަމީންގެ ހައްގުތަކަށް އުނިކަންވެސް އަންނާނެ ކަމަށެވެ.
ޝަރީއަތް ސިއްރުކުރަން ދައުލަތުންވެސް ދެކޮޅު ހަދާފައިވނުވާއިރު، ފަނޑިޔާރުންގެ ބެންޗުން ނިންމީ މިވަގުތު އާންމުކޮށް ހުޅުވާލައިގެން ޝަރީއަތް ކުރިއަށް ގެންދިއުމަށެވެ.
2007 ވަނަ އަހަރު ސަލްޓަންޕާކްގެ ބޮމުގެ މައްސަލާގައި ވެސް އަމީން އަށް ތުހުމަތު ކުރި އިރު މައްސަލާގައި ރާއްޖެއިން ބޭރުގައި އޭނާ ހުއްޓާ އިންޓަޕޯލް ރެޑް ނޯޓިސްއެއްގެ ދަށުން އޭނާ ހައްޔަރުކޮށްގެން ރާއްޖެ ވެސް ގެނެއެވެ. ނަމަވެސް 2012 ވަނަ އަހަރު އޭނާ ވަނީ ދޫކޮށްލާފައެވެ.
އަމީން އަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ހިމެނުނު ފުރަތަމަ ދިވެހި މީހާ ކަމަށްވާއިރު އެ ހުރިހާ ތުހުމަތަކަށް އޭނާ ވަނީ އިންކާރު ކޮށްފައެވެ.
