ސަރުކާރުގެ ސިޔާސަތު ތަންފީޒުކުރަން ސިވިލް ސާވިސް މުވައްޒަފުން އެކުގައި މަސައްކަތް ކުރަން ޖެހޭކަމަށް ރައީސްގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
ސަރުކާރަށް އެއް އަހަރު ފުރުމާ ގުޅިގެން، ހެލްތު މިނިސްޓްރީގެ ސިވިލް ސާވަންޓުގެ އަގު ވަޒަން ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މެޑަމް ސާޖިދާ ވިދާޅުވީ ކޮންމެ ސަރުކާރަކުން ކޮންމެ ބަޔަކު ކޮންމެ ޕޮލިސީއެއް ހިފައިގެން އަޔަސް ސިވިލް ސާވަންޓުންނަކީ އެ ޕޮލިސީތައް ތަންފީޒުކުރަން ތިބޭ ބައެއް ކަމަށެވެ.
އެގޮތުން ވޭޕުގެ މިސާލު ނަންގަވާ ސާޖިދާ ވިދާޅުވީ ވޭޕު މަނާ ކުރަން ނިންމުމަކީ ހަމައެކަނި ސަރުކާރުގެ ޕޮލިސީއެއް ނޫންކަމަށާއި އެއީ "ޕަބްލިކް ހެލްތް އިންޓަވެންޝަން" އެއް ކަމަށެވެ. އެހެންކަމުން މި ކަމުގައި ހެލްތް މިނިސްޓްރީގެ ސިވިލް ސާވެންޓުން އެއްބާރުލުން ނުދެއްވައިފިނަމަ މި ކަމުގައި އެއްބާރުލުން ދޭނެ އިތުރު ބަޔަކު ނުވާނެކަން ވެސް ސާޖިދާ ވަނީ ފާހަގަކުރައްވާފައެވެ.
މީގެއިތުރުން ސާޖިދާ ވިދާޅުވީ ހިތްހަމަނުޖެހުންތަކާ ކުރިމަތިލާން ޖެހޭ ފަހަރު އަންނާނެ ކަމަށާއި ނަމަވެސް އެ ހިތްހަމަނުޖެހުންތަކާ އެކު ކުރިއަށް ގޮސް، އެ ކަންކަން ރަނގަޅު ކުރަން މަސައްކަތް ކުރަން ޖެހޭ ކަމަށެވެ.
މި ރަސްމިއްޔާތުގައި ސާޖިދާ ވަނީ ސިއްހީ ދާއިރާގެ ފަރާތްތަކަކީ ނުހަނު އިހުލާސްތެރިކަމާއެކު މަސައްކަތްކުރައްވާ ބައެއްކަން ފާހަގަކުރައްވާ އެގޮތުގައި ކުރިއަށް ދިއުމަށް އިލްތިމާސްކުރައްވާފައެވެ.
މި ރަސްމިއްޔާތުގައި ހެލްތު މިނިސްޓްރީގައި މިވަގުތު ހުންނެވި އެންމެ ގިނަ ދުވަސްވީ ސިވިލް މުވައްޒަފަށް ކޭކެއް ފެޅުންވެސް އޮތެވެ. އަދި މި ރަސްމިއްޔާތުގައި ސާޖިދާ ވަނީ ހެލްތު މިނިސްޓްރީގެ ސިވިލް ސާވިސް މުވައްޒަފުންގެ މަސައްކަތުގެ އަގުވަޒަންކޮށް ދެއްވާ ޝުކުރުގެ ބެޖުވެސް ހަވާލުކޮށްދެއްވާފައެވެ.
