އާސަންދަ މިހާރު ދޭ ގޮތް ބަދަލުކޮށް ދެމެހެއްޓެނިވި ނިޒާމަކަށް ބަދަލުކުރުމުން އަންނަ އަހަރު 500 މިލިއަން ރުފިޔާ ސަލާމަތްކުރެވޭނެ ކަމަށް، ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ އަށް ހާޒިރުވެވަޑައިގެން ވާހަކަ ދައްކަވަމުން ޒަމީރު ވިދާޅުވީ، ބަލްކް ޕްރޮކިއުމަންޓާއި އާސަންދަ އަށް ގެންނަން ނިންމާފައިހުރި ބަދަލުތަކާ އެކު ވެސް އާންމުންނަށް ދޭ ހިދުމަތްތަކަށް އެއްވެސް ބަދަލެއް ނާންނާނެ ކަމަށެވެ.
ޒަމީރު ވިދާޅުވީ، އާސަންދަ އަށް މި ގެންނަ ބަދަލުތަކުގެ ސަބަބުން ހަރަދުތަކުން 500 މިލިއަން ރުފިޔާ ސަލާމަތްކުރެވޭނެ ކަމަށް ހިސާބުތަކުން ދައްކާ ކަމަށެވެ.
ސަރުކާރުން މިިފަހުން ވަނީ އަމިއްލަ އިންޝުއަރެންސްތަކުން ކަވަރުކުރާ ހިދުމަތްތަކަށް އާސަންދަ ނުދިނުމަށާއި، އަންނަ އަހަރުން ފެށިގެން މުއްސަނދިން އަތުން އާސަންދަ އަށް ވަކި އަދަދެއް ދައްކަން ޖެހޭ ގޮތަށް ބަދަލުކުރުމަށާއި، އަމިއްލަ ހޮސްޕިޓަލްތަކުން ހޯދާ ހިދުމަތްތަކަށް ޕެކޭޖުތަކެއް ތައާރަފްކުރުމަށް ނިންމައިފައެވެ.
މި ބަދަލުތަކާ އެކު އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް ކުޑަ ކުރެވޭނެ ކަމަށް އަންނަ އަހަރަށް ލަފާކޮށް ހުށަހެޅި ބަޖެޓުގައި އަންދާޒާކޮށްފައިވެއެވެ.
