ސައުދި އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒްގެ ދައުވަތަކަށް، ޖޮއިންޓް އަރަބް އިސްލާމިކް ސަމިޓުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު ސައުދީ އަރަބިއްޔާގެ ރިޔާދަށް ވަޑައިގެންފިއެވެ.
ރައީސް ޑރ. މުއިއްޒު ސައުދީގެ ކިންގް ހާލިދް އިންޓަނޭޝަނަލް އެއާޕޯޓަށް ވަޑައިގެންނެވުމާއެކު އެ މަނިކުފާނަށް މަރުހަބާ ވިދާޅުވެފައިވަނީ ސައުދީގެ ޑެޕިއުޓީ ގަވަރުނަރު ޕްރިންސް މުހައްމަދު ބިން އަބްދުއްރަހްމާން ބިން އަބްދުލް އަޒީޒްއެވެ.
މަތީ ފަންތީގެ ވަފުދަކާ އެކު ކުރައްވާ މި ދަތުރުފުޅުގައި، އިޒްރޭލުގެ އިސްތިއުމާރީ ބާރުތަކުން ފަލަސްތީނާއި ލުބްނާނަށް ދެމުންދާ ހަމަލާތަކާއި ސަރަހައްދީ ގޮތުން ފާހަގަކުރެވޭ ނާޒުކް މައްސަލަތަކާ މެދު، އިސްވެރިން ކުރައްވާ މަޝްވަރާގައި ވެސް ރައީސް ބައިވެރިވެވަޑައިގަންނަވާނެއެވެ. މިއަދު ބާއްވާ ސަމިޓުގެ ސެޝަންގައި ރައީސް ވާހަކަފުޅުވެސް ދައްކަވަން ވަނީ ހަމަޖެހިފައެވެ.
ރައީސް މުއިއްޒު ގެންދަވަނީ، ފަލަސްތީނުގެ ރައްޔިތުންގެ ހައްގުގައި އަޑުއުފުއްލަވައި، އިޒްރޭލުގެ އަމަލުތައް ކުށްވެރިކުރައްވާ ފަލަސްތީނާއި ލުބްނާނަށް ދެމުންދާ ހަމަލާތައް ކުށްވެރިކުރައްވަމުންނެވެ. އެގޮތުން ޖުމްހޫރީ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައިވެސް ވާހަކަފުޅުދައްކަވަމުން ރައީސް ވިދާޅުވީ ފަލަސްތީނުގެ ރައްޔިތުންގެ ހައްގުގައި އެންމެ ކެރިގެން ވަކާލާތުކުރާ އެއް ގައުމަކަށް ރާއްޖެ ވާނެ ކަމަށެވެ.
