ރާއްޖޭގެ ހުރިހާ ސްކޫލެއް ދެ އަހަރުގެ ތެރޭގައި އޭސީ ކުރަން ނިންމާ އިފްތިތާހުކުރި "ކޫލް ސްކޫލް" ޕްރޮޖެކްޓަށް ޗައިނާ އެމްބަސީ އިން އޭސީ ހަދިޔާކޮށްފިއެވެ.
އެޑިއުކޭޝަން މިނިސްޓްރީ އިން ބުނީ މި ތަކެތި އެޑިއުކޭޝަން މިނިސްޓަރު ޑރ. އިސްމާއިލް ޝަފީއުއާ ހަވާލުކޮށްދެއްވާފައިވަނީ ރާއްޖޭގައި ހުންނަވާ ޗައިނާގެ ސަފީރު ވަންގް ލިޒިން ކަމަށެވެ.
އެޑިއުކޭޝަން މިނިސްޓްރީ އިން ބުނީ މި އޭސީތައް ހުޅުމާލެ ސެންޓާ ފޯ ހަޔާ ސެކަންޑްރީ އެޑިއުކޭޝަން (ސީއެޗްއެސްސީ) ސުކޫލުގައި ހަރުކުރުމަށް ނިންމާފައިވާކަމަށާއި މިއާއެކު ދަރިވަރުން ކިޔެވުމަށް ފަސޭހަ މާހައުލެއް ގާއިމުކުރެވިގެންދާނެ ކަމަށެވެ.
"ކޫލް ސްކޫލް" ޕްރޮޖެކްޓް އިފްތިތާހުކޮށްފައިވަނީ މި އަހަރުގެ ޖޫން މަހު މާފުށީ ސްކޫލްގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ "ކޫލް ސްކޫލް" ޕްރޮޖެކްޓަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން ފަށާ ޕްރޮޖެކްޓެއް ކަމަށާއި، އަދި އޭސީ ކުރަން މި ފަށާ ޕްރޮޖެކްޓަކީ ފިނިކުރުމަކުން ނިންމާލާ ކަމެއް ނޫން ކަމަށެވެ.
އެގޮތުން ދަރިވަރުން ކިޔެވުމުގެ ކަންކަން ފުރިހަމަ ވެފައިވާ ވެއްޓެއް ގާއިމުވެގެން ދިއުމަކީ ކުދިންގެ ދުޅަ ހެޔޮކަމަށްވެސް އޭގެ ސަބަބުން ފައިދާ ކުރާނެ ކަމެއް ކަމަށާއި، މިކަމުގެ ސަބަބުން ގައުމަށް އަދި އެ ކުދިންގެ މުޅި ދިރިއުޅުމަށް އުޖާލާކުރެވިގެން ދާނެ ކަމަށް މިނިސްޓަރު ވަނީ ވިދާޅުވެފައެވެ.
