ދިވެހިރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، ސަރުކާރަށް ނޭނގި ތޯލިބާނުގެ މަންދޫބަކާ ބައްދަލުކުރި މައްސަލައިގައި އޭނާ މަގާމުން ވަކިކޮށް، އަނބުރާ ރާއްޖެ ގެނައުމަށް ނިންމައިފިއެވެ.
އަފްގާނިސްތާނުގައި ތޯލިބާނުން ހިންގާ ސަރުކާރުން ޕާކިސްތާނަށް ކަނޑައަޅާފައި ހުންނަ އެކްޓިން އެމްބެސަޑަރު ސަރްދާރް އަހުމަދު ޝަކީބުއާއި ތޯހާ ބައްދަލު ކުރެއްވި ފޮޓޯތަކެއް ދައުރުވުމާ ގުޅިގެން ފޮރިން މިނިސްޓްރީން ވަނީ އެކަން ކުށްވެރިކޮށް އޭނާއާމެދު ފިޔަވަޅު އަޅާފައިވާ ކަމަށް ބުނެފައެވެ.
އެ މިނިސްޓްރީން އިއްޔެ ނެރުނު އެ ބަޔާނުގައި އެޅީ ކޮން ފިޔަވަޅެއްކަން ހާމަކޮށްފައި ނުވި ނަމަވެސް ތޯހާ މަގާމުން ވަކި ކުރިކަން "ދަ ޕްރެސް" އަށް ވަނީ ކަށަވަރު ކުރެވިފައެވެ. އަދި ކުރިއަށް އޮތް ހަފްތާއެއްހާ ދުވަހު އޭނާ އެނބުރި ރާއްޖެ ގެންނާނެ ކަމަށްވެސް މި ނޫހަށް ވަނީ ޔަގީން ކުރެވިފައެވެ.
ތޯލިބާނުން އަފްގާނިސްތާން ހިފައި ބާރުގެ ދަށަށް ގެންދިޔައީ 2021 ވަނަ އަހަރު އެވެ. މިހާރު އަފްގާނިސްތާނު ހިންގަމުން އަންނަނީ ތާލިބާނުން އެކުލަވާލާފައިވާ ސަރުކާރެއްގެ ދަށުންނެވެ. މިހާތަނަށް އެއްވެސް ގައުމަކުން ތާލިބާންގެ ވެރިކަން ރަސްމީ ސިފައެއްގައި ބަލައިގަންފައި ނުވާއިރު ތޯހާ ތޯލިބުންނާ ބައްދަލު ކުރުމުން ސަރުކާރުން ވަނީ އެކަމާ ކަންބޮޑުވުން ފާޅުކޮށްފައެވެ.
މަގާމާ ހަވާލުވެ ތޯހާ ސަފީރުކަމުގެ ފަތްކޮޅު ޕާކިސްތާނުގެ ރައީސް އާސިފް އަލީ ޒަރްދާރީ އަށް އެރުވީ މިދިޔަ އޯގަސްޓު މަހުގެ 14 ވަނަ ދުވަހު އެވެ. އޭނާ ފުރަތަމަ އައްޔަން ކުރީ ސައުދީ އަރަބިއްޔާގެ ސަފީރަކަށެވެ. ނަމަވެސް ސަރުކާރުން ވަނީ ފަހުން މަގާމު ބަދަލުކޮށް ޕާކިސްތާނުގެ ސަފީރަކަށް ތޯހާ އައްޔަން ކޮށްފައެވެ.
