ސަރުކާރުގެ ކުންފުނިތަކާއި ސަރުކާރު ބައިވެރިވާ ކުންފުނިތަކުގެ އިތުރުން ވިޔަފާރި އުސޫލުން ހިންގާ ސަރުކާރުގެ ތަންތަނުގެ ބަޖެޓު އެކުލަވާލުމުގައި އަމަލު ކުރާނެ ގޮތް ބަދަލުވެއްޖެއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު ނެރުނު ސާކިއުލާއެއްގައި ބުނީ، ސަރުކާރު ހިއްސާާވާ ކުންފުނިތަކުގެ ބަޖެޓު އެއްހަމައަކުން ދިރާސާކޮށް، ލުއިފަސޭހަ ކުރުމަށްޓަކައި އާންމު އުސޫލެއް އެކުލަވައިލާފައިވާ ކަމަށެވެ.
އެގޮތުން އާ އުސޫލާ އެއްގޮތްވާ ގޮތުގެ މަތިން ބަޖެޓު ހަދަން ފަށާނީ 2026 ވަނަ އަހަރުން ފެށިގެން ކަމަށް ޕީސީބީން ވަނީ ބުނެފައެވެ. އަދި މިގޮތަށް ނިންމާފައި ވަނީ އަންނަ އަހަރުގެ ބަޖެޓު އެކުލަވައިލުމުގެ މަރުހަލާ ކުންފުނިތަކުން މިހާރު ފަށާފައިވާތީ ކަމަށް ވެސް ވެއެވެ.
އެހެން ނަމަވެސް، ބަޖެޓު ރިވިއު ކުރުމާއި ގެންނަން ޖެހޭ ބަދަލުތައް ގެނައުމާއި އިންޓާނަލް އޮޑިޓް ފަންކްޝަނިން މަސައްކަތްތައް ކުރަންޖެހޭނީ އާ އުސޫލުގެ ތެރެއިން ކަމަށް އެ އިދާރާ އިން ނެރުނު ސާކިއުލާގައި ވަނީ ބުނެފައެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އުފައްދާފައި ވަނީ ދައުލަތުގެ ކުންފުނިތައް ޕްރައިވަޓައިޒް ކުރުމާއި ކޯޕަރަޓައިޒްކުރުމާއި މޮނިޓާކޮށް އިވެލުއޭޓް ކުރުމުގެ ގާނޫނުގެ ދަށުން 2013 ވަނަ އަހަރުއެވެ. ޕީސީބީ އަށް ރައީސް އައްޔަން ކުރައްވާ ބޭފުޅުންނަށް މަގާމު ލިބިގެން ދާނީ ރައްޔިތުންގެ މަޖިލީހުގެ ރުހުމާއެކުގައެެވެ.
ޕީސީބީން އަންނަނީ ދައުލަތުގެ ކުންފުނިތަކުގެ ހިންގުން ހަރުދަނާކޮށް، ކުންފުނިތަކުގެ ހަރަދުތައް ކުޑަކުރުމަށް ފިޔަވަޅުތައް ވަރުގަދަ ކުރަމުންނެވެ.
