ކުރީގެ ޑިފެންސް މިނިސްޓަރު އަދި ޗީފް އޮފް ޑިފެންސް ފޯސް މޭޖާ ޖެނެރަލް ރިޓަޔާޑް މޫސާ އަލީ ޖަލީލަށް، ރައީސް ޑރ. މުހައްމަދު މުއިއްޒު ނިޝާން އަސްކަރީގެ ވެރިކަމުގެ އިއްޒަތް އަރުވައިފިއެވެ.
މި އިއްޒަތް އޭނާ އަށް އެރުވީ ނަސްރުގެ ދުވަސް ފާހަގަކުރުމަށް ދަރުބާރުގޭގައި މިރޭ ބޭއްވި ރަސްމީ ޖަލްސާގައެވެ.
އޭނާ އަށް އިއްޒަތް އެރުވުމުގެ ކުރިން ރައީސް ވަނީ މިކަމާ ގުޅިގެން ގަރާރެއް އިއްވައިފައެވެ. އެ ގަރާރުގައިވާ ގޮތުން މި އިއްޒަތް އޭނާ އަށް އަރުވަން ރައީސް ނިންމެވީ ގައުމަށާއި އާންމުންގެ ސަލާމަތަށްޓަކައި ޢަސްކަރީ ގޮތުން ޖަލީލު ކުރެއްވި ހިދުމަތްތަކާއި، ގައުމުގެ އިސްތިގްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތުގެ އަގުވަންޒަންކުރުމުގެ ގޮތުން ކަމަށެވެ.
ވަކިން ހާއްސަކޮށް ނޮވެމްބަރު 3، 1988 ގައި ގައުމަށް ކުރިމަތިވި އުދުވާނީ ހަމަލައާ ގުޅިގެން، ގައުމާއި އާންމުންގެ ދިފާއުގައި ކުރެއްވި ޖިހާދުގެ އަގުވަޒަންކުރުމުގެ ގޮތުން ކަމަށް ވެސް އެ ގަރާރުގައި ވެއެވެ.
ރައީސް ގަރާރު އިއްވަވަމުން ގެންދެވި ވަގުތު، މޫސާ އަލީ ޖަލީލު ކީރިތިކުރައްވަމުން ގެންދެވި މަންޒަރު ފެނިފައިވެއެވެ.
މެޖާ ޖެނެރަލް ރިޓަޔާޑް މޫސާ އަލީ ޖަލީލް
- ސިފައިންގެ ހިދުމަތާ ގުޅިވަޑައިގަތީ ޖުލައި 3، 1980 ގައި
- ލާންސްކޯޕްރަލުން ފެށިގެން މޭޖާ ޖެނެރަލާ ހަމައަށް އަސްކަރިއްޔާގެ އިސް ރޭންކްތައް ފުރުއްވާފައިވޭ
- ރިޓަޔާކުރެއްވުމަށް ފަހު ޑިފެންސް މިނިސްޓަރުގެ މަގާމު ފުރުއްވާފައިވޭ
- ޝަރަފުގެ ނިޝާނުގެ ގޮތުގައި ނުވަ ކުލައާއި 11 މެޑެލް ލިބިވަޑައިގެންނެވި
- ލިބިވަޑައިގެންނެވި ބައެއް މެޑެލްތަކުގެ ތެރޭގައި ނޮވެމްބަރު 3 ގެ މެޑެއްޔާއި ޖިހާދުގެ ރަތް މެޑެއްޔާއި ހުރަވީ ރަން މެޑެއްޔާއި ރައިސުލްޖުމްހޫރިއްޔާގެ މެޑެލް ހިމެނޭ
