ކުރިއަށް އޮތް ހަތަރު އަހަރު ހިދުމަތަށް 4000 ސިފައިން ނެރުމަށް ހާއްސަ ޕްރޮގްރާމެއް އަންނަ އަހަރު ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ ކޮންމެ އަހަރަކު 1000 ސިފައިން ރެކްރޫޓުކުރުމަށްޓަކައި ގައުމީ ފެންވަރުގައި ހާއްސަ ޕްރޮގްރާމެއް އަންނަ އަހަރު ފައްޓަވާނެ ކަމަށެވެ. މި ޕްރޮގްރާމުގެ ދަށުން ސިފައިންގެ އިތުރުން ފުލުހުންގެ ހިދުމަތަށްވެސް އަހަރަކު 250 ފުލުހުން ރެކްރޫޓް ކުރައްވާނެ ކަމަށް ރައީސް ވަނީ ވިދާޅުވެފައެވެ.
މިއާއެކު ކުރިއަށް އޮތް ހަތަރު އަހަރު ހިދުމަތަށް 4000 ސިފައިން އަދި 1000 ފުލުހުން ނެރެވިގެން ދާނެ ކަމަށް ރައީސް ވަނީ ވިދާޅުވެފައެވެ. ރައީސް ވަނީ އަންނަ އަހަރު ސިފައިންގެ ހިދުމަތަށް ބޭނުންވާ ގިނަ އަދަދެއްގެ ހަތިޔާރުވެސް ހޯއްދަވައިދެއްވާނެ ކަމުގެ ޔަގީންކަން ދެއްވާފައެވެ.
ނަސްރުގެ ދުވަހުގެ ހަނދާންތައް އާކުރައްވަމުން ރައީސް ވިދާޅުވީ 8 ސިފައިންގެ މީހުންނާއި، 11 އާންމުންގެ މީހުންނާއެކު ޖުމުލަ 19 މީހުން ޝަހީދުވި މި ހާދިސާ އިން އިބްރަތް ލިބިގަންނަން ޖެހޭނެ ކަމަށެވެ.
މީގެއިތުރުން ރައީސް ވިދާޅުވީ އަންނަ އަހަރުން ފެށިގެން ޝަހީދުވި އާއިލާތަކަށާއި 3 ނޮވެމްބަރުގައި ބްރޭވަރީ މެޑަލް ލިބުނު ފަރާތްތަކަށް ގެެޒެޓު ކުރެވޭ އުސޫލެއްގެ މަތިން ހާއްސަ އެލަވަންސެއް ދެއްވާނެ ކަމަށްވެސް ރައީސް ވަނީ ވިދާޅުވެފައެވެ. ރައީސް އިތުރަށް ވިދާޅުވީ މި ދަައުރު ނިމުމުގެ ކުރިން ޝަހީދުވި އާއިލާތަކަށް ހާއްސަ ކޮށްގެން 50 ހައުސިން ޔުނިޓު އަޅުއްވާ ހަވާލުކުރައްވާނެ ކަމަށެވެ.
ނަސްރުގެ ދުވަހުގެ މުނާސަބަތުގައި މިއަދު ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. އެގޮތުން ކުރިއަށް ގެންދިޔަ ހަރަކާތްތައް ފަށާފައިވަނީ މިއަދު ފަތިހު ސިފައިން ބައިވެރިވެގެން ޖަމާއަތުގައި ކުރި ފަތިސް ނަމާދުންނެވެ. އިސްލާމީ މަރުކަޒުގައި ޖަމާއަތުގައި ފަތިސް ނަމާދު ކުރުމަށްފަހު މިއަދު ހެނދުނު ވަނީ، ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމަށް ހާއްސަ ރަސްމިއްޔާތެއް ކުރިއަށް ގެންގޮސްފައެވެ. އަދި ހަމައެހެންމެ މިއަދު ހެނދުނު ވަނީ ނޭޝަނަލް އާޓް ގެލަރީގައި "ސިފައިންގެ މައުރަޒު" ރައީސް ހުޅުވާދެއްވާފައެވެ.
