މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އިން ރާއްޖޭގެ ހުރިހާ ދިވެހިންނަށް ހުޅުވާލައިގެން ލޭންޑްމާކް ފަރުމާ ކުރުމުގެ މުބާރާތެއް ބޭއްވުމަށް ނިންމާ، މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
އެމްއެމްޕީއާރުސީ އިން ބުނީ ލޭންޑްމާކް ބެހެއްޓުމަށް ރޭވިފައިވަނީ ރާއްޖޭގެ ހިތްގައިމު މަންޒިލްތަކުގެ ތެރެއިން ވެލާނާ އިންޓަނޭޝަނަލް އެއާޕޯޓް، މާލެ ސިޓީ، ކަނޑުއަޑި އަދި ގްރޭޓަރ މާލެ ސަރަޙައްދު ފިޔަވައި އެހެނިހެން ރަށްތަކުގައި ކަމަށެވެ. މިއީ ރާއްޖޭގެ ހިތްގައިމުކަން ދައްކުވައިދިނުމާއި، ދިވެހިންގެ ފަންނުވެރިކަން ދައްކާލުމަށާއި ފަތުރުވެރިންނަށް ރާއްޖެއިން ލިބެންހުރި ތަފާތު ތަޖުރިބާތައް އިތުރުކުރުމުގެ މަގުސަދުގައި ބާއްވާ މުބާރާތެއްކަމަށް އެމްއެމްޕީއާރުސީން ވަނީ ބުނެފައެވެ.
އެމްއެމްޕީއާރުސީން ބުނީ އަމާޒަކީ، މި ލޭންޑްމާކް ފަރުމާ ކުރުމުގެ މުބާރާތް މެދުވެރިކޮށް، ދިވެހިންގެ ހުނަރުގެ މުއްސަނދިކަން ދައްކާލުން ކަމަށެވެ. އަދި މި ފަރުމާތަކުގެ ސަބަބުން ރާއްޖޭގެ ރަށްތައް އިތުރަށް ޒީނަތްތެރިވުމުގެ އިތުރުން ދިވެހި އުފެއްދުންތެރިކަމާއި ސަގާފީ ތަރިކައިގެ ދެމެހެއްޓެނިވި ރަމްޒެއްގެ ގޮތުގައި ވެސް ފަތުރުވެރިންނަށް ދައްކާލުންކަމަށާއި އަދި ދުނިޔޭގެ ފަތުރުވެރިކަމުގެ މައިދާނުގައި ސަނީ ސައިޑް އޮފް ލައިފްގެ މަގާމް އިތުރަށް މުއްސަނދިވެގެންދިއުން ކަމަށެވެ.
- މި މުބާރާތަކީ އުމުރުން 18 އަހަރުން މަތީގެ ހުރިހާ ދިވެހި ރައްޔިތުންނަށް ހުޅުވާލެވިފައިވާ މުބާރާތެކެވެ.
- މި މުބާރާތުގައި އެކިއެކި ރަށްތަކާއި ސަރަހައްދުތަކުގެ މުއްސަނދި ތަރިކައާއި ސަގާފަތާއި ހިތްގައިމު ގުދުރަތީ ރީތިކަން ދައްކުވައިދޭ ފަރުމާތައް ހުށައެޅޭނެއެވެ.
އެމްއެމްޕީއާރުސީން ބުނީ މި މުބާރާތުގެ އެންމެ މޮޅު 10 ފަރުމާ ހޮވާނީ ޓެކްނިކަލް ޖަޖުންގެ ޕެނަލެއްގެ އިވެލުއޭޝަނާ އާންމުންގެ ވޯޓާ އެއްކޮށްގެންނެވެ. މުބާރާތުގެ އެންމެ މަތިން މާކްސް ލިބޭ 10 ފަރާތަކަށް 20،000 ރުފިޔާގެ ފައިސާގެ އިނާމަކާއި ސްޕޮންސަރުންގެ ހެޔޮ އެދުންތަކާއެކު ގިފްޓް ޕެކެއްވެސް ހަދިޔާކުރާނެވެ. މީގެ އިތުރުން، އެމްއެމްޕީއާރުސީން ބުނީ މުބާރާތުގައި ހޮވޭ އެންމެ މޮޅު 10 ފަރުމާ އެމްއެމްޕީއާރުސީގެ މާކެޓިން ހަރަކާތްތަކުގައި ބޭނުންކުރުމަށް ހަމަޖެހިފައިވަނީ ފަރުމާކުރި ފަރާތްތަކަށް ކްރެޑިޓް ދީގެން ކަމަށެވެ.
ލޭންޑްމާކް ފަރުމާ ކުރާނެ ގޮތް
- ދެމެހެއްޓެނިވި ތަކެތި ބޭނުންކޮށްގެން ފަރުމާތައް ހަދަންވާނީ އުސްމިނުގައި 20 ފޫޓު ހުންނަ ގޮތަށެވެ.
- ކޮންމެ ލޭންޑްމާކްއަކުން ވެސް ފަރުމާކުރަންވާނީ، ދިވެހި ތާރީހާއި، އެ ރަށެއް ނުވަތަ ސަރަޙައްދެއްގެ ތަފާތު ސިފަތައް ހިމަނައިގެންނެވެ.
- އުފެއްދުންތެރިކަމާއި ރައްކާތެރިކަމާއި ވިޝުއަލް އެޕީލް އަދި ދިގު މުއްދަތަކަށް ދެމިހުންނާނެފަދަ ޑިޒައިންތަކަށް ޖަޖިން ޕެނަލްއިން އިސްކަން ދޭނެއެވެ.
- ކޮންމެ ބައިވެރިއަކަށް ވެސް ހުށަހެޅޭނީ އެއް ލޭންޑްމާކްގެ ފަރުމާކަމަށާއި މި ހުށަހެޅުންތައް ހުންނަންވާނީ ކެޑް އަދި ޕީޑީއެފް ފޯމެޓްގައި ސާފު ޑައިމެންޝަންތަކެއް ބަޔާންކޮށްފައިވާ ގޮތަށެވެ.
އެމްއެމްޕީއާރްސީން ބުނީ މުބާރާތުގެ އެންޓްރީތައް އީމެއިލް މެދުވެރިކޮށް ހުށަހަޅަން ޖެހޭނީ ނޮވެމްބަރު 30، 2024 ވާ ހޮނިހިރު ދުވަހުގެ ހަވީރު 6:00 ގެ ކުރިން އަށެވެ. މީގެ އިތުރުން، މުބާރާތުގައި ބައިވެރިވުމަށް ލޭންޑްމާކް ހުށަހަޅާފައިވާ ތަނުގެ ވިޝުއަލް ރިޕްރެޒެންޓޭޝަނަކާއި (އޮޕްޝަނަލް) ފުރިހަމަ އެޕްލިކޭޝަން ފޯމަކާއި ސައްހަ އައިޑީއެއްގެ ކޮޕީއެއް ހުށަހަޅަންވާނެކަމަށް ވަނީ ބުނެފައެވެ.
