ދުނިޔޭގެ ފެންވަރުގައި ރީތީގެ ރާނީ ހޮވުމަށް ބާއްވާ 73 ވަނަ، މިސް ޔުނިވާސް 2024 ގައި ރާއްޖެ އިން ބައިވެރިވެއްޖެއެވެ.
މި މުބާރާތުގައި ރާއްޖެ ތަމްސީލުކުރާނީ އުމުރުން 21 އަހަރުގެ މޮޑެލް، މަރިޔަމް ޝައިނާ ނަސީމެވެ.
އިންޑިއާގައި ހުންނަ މެކްސިކޯގެ އެމްބަސީން މިއަދު ކުރި ޓްވީޓެއްގައި ބުނެފައި ވަނީ، މިސް ޔުނިވާސް 2024 ގައި ރާއްޖެ ތަމްސީލް ކުރާ ޝައިނާ މެކްސިކޯއަށް ދިއުމަށް ވިސާ ހަމަޖައްސައިދީފައި ވާކަމަށެވެ. އަދި މިއީ ރާއްޖޭގެ ތާރީހުގައި ވެސް މިސް ޔުނިވާސް މުބާރާތުގައި ރާއްޖެއިން ބައިވެރިވާ ފުރަތަމަ ފަހަރު ކަމަށް ވެސް އެ އެމްބަސީން ބުނެފައި ވެއެވެ.
މިއަހަރުގެ މިސް ޔުނިވާސް މުބާރާތް މެކްސިކޯގައި ބޭއްވުމަށް ހަމަޖެހިފައިވާ އިރު، މި މުބާރާތް ފަށާނީ އަންނަ މަހުގެ 14 ވަނަ ދުވަހުއެވެ. އަދި ފައިނަލް ޝޯ ބާއްވަނީ އަންނަ މަހުގެ 16 ގައެވެ.
މޮޑެލް ކުރާ ޝައިނާ ވަނީ ރާއްޖޭގައި ބޭއްވި ޓޮޕް މޮޑެލް މޯލްޑިވްސް 2022ގައި ބައިވެރިވެ، އެ މުބާރާތް ކާމިޔާބު ކޮށްފައެވެ. އަދި މިދިޔަ އަހަރު މިސްރުގައި ބޭއްވި ޓޮޕް މޮޑެލް އޮފް ދަ ވޯލްޑް 2023 ގައި ވެސް އޭނާ ވަނީ ބައިވެރިވެފައެވެ.
މިއަހަރުގެ މިސް ޔުނިވާސް މުބާރާތަކީ 130 ބައިވެރިން ބައިވެރިވާ ތާރީހީ މުބާރާތެކެވެ. ރާއްޖެއިން އަލަށް މި މުބާރާތުގައި ބައިވެރިވާ އިރު، 57 އަހަރަށްފަހު ކިއުބާއިން މިސް ޔުނިވާސް މުބާރާތުގައި ބައިވެރިވާން ވަނީ ނިންމާފައެވެ. އަދި މިދިޔަ އަހަރު ބޭއްވި މިސް ޔުނިވާސް މުބާރާތުގައި ބައިވެރި ނުވާ އުރުގުއޭ އިން ވެސް ވަނީ ބައިވެރިވާން ނިންމާފައެވެ.
