ދިވެހި ތާރީހުގައި ފުރަތަމަ ފަހަރަށް މިސް ޔުނިވާސްގައި ވާދަ ކުރާ މަރިޔަމް ޝައިނާ ނަސީމަށް ދަ ޑިމޮކްރަޓްސް އިން މަރުހަބާ ކިޔައިފިއެވެ.
ދުނިޔޭގެ އެކި ކަންކޮޅުތަކުން ހޮވާލެވޭ 'ބިއުޓީ ޕެޖެންޓުންގެ' މެދުގައި ބާއްވާ މިސް ޔުނިވާސް މުބާރާތާގައި ޝައިނާ ބައިވެރިވުމާ އެކު ގިނަ ބައެއްގެ ފާޑު ކިޔުން އަމާޒުވެފައިވާ މި ދަނޑިވަޅުގައި "ދަ ޑިމޮކްރަޓްސް" އިން ނެރުނު ކުރު ބަޔާނެއްގައި ބުނީ، އަންހެނުން ބާރުވެރި ކުރުމަށް ރާއްޖޭގައި ވަކާލާތު ކުރަން ފެށީ ކުރީގެ ރައީސް މުހައްމަދު އަމީން ގެ ވެރިކަމުގައި ކަމަށެވެ.
އެހެންކަމުން ފިރިހެނުންނަށް އޮންނަ ކޮންމެ ފުރުސަތެއް އަންހެނުންނަށްވެސް ލިބިދިނުމަކީ ދެން މިރާއްޖޭގައި އެއާ އިންކާރުކުރެވި ދެކޮޅުހެދޭނޭ ކަންކަމެއް ނޫންކަން ފާހަގަ ކޮށް އެ ބަޔާނުގައި ބުނީ، ރާއްޖެ އަނބުރާ އައިކޮޅަށް ފަހަތަށް ގެންދިޔުމަކީ އެއްވެސް ވަޒީރަކަށްވެސް، އެއްވެސް ވެރިޔަކަށްވެސް އޮތް ބާރެއް އަދި އޮތް އިހުތިޔާރެއްވެސް ނޫން ކަމަށެވެ.
ޝައިނާ އަށް ޑިމޮކްރެޓްސް އިން ނުހަނު މަރުހަބާ ކިޔާ ކަމަށާއި އޭނާ އެ ނުކުންނަނީ ރާއްޖެއަށް ވަރަށް ފަހުރުވެރި ނަމެއް ހޯދުމަށް ކަމަށާއި އެކަމުގައި ފުރިހަމަ ކާމިޔާބީއަށް އެދޭ ކަމަށް ޑިމޮކްރަޓުން ވަނީ ބުނެފައެވެ.
މިސް ޔުނިވާސް އަށް ޝައިނާ ވާދަކުރާތީ އެކަން ހުއްޓައިލުމަށް ގޮވާލައި ސަރުކާރުން ވަނީ އެކަން ކުށްވެރިކޮށްފައެވެ. ޔޫތް މިނިސްޓްރީން މިއަދު ނެރުނު ބަޔާނުގައި ބުނީ ދިވެހިން ގަބޫލު ކުރާ އާންމު އަހުލާގީ މިންގަނޑު ތަކާ މުޅިން ހިލާފަށް ރާއްޖެ ތަމްސީލު ކުރުމުގެ ނަމުގައި ދިވެއްސަކު އެފަދަ ހަރަކާތަށް ދިޔުމަކީ ސަރުކާރުން ކުށްވެރި ކުރާ ކަމެއް ކަމަށެވެ.
