ކޮންމެ ޖިއްސެއްގެ ބަޔަކު ކުރި ކަމެއް ނަމަވެސް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ކާމިޔާބީއެއް ލިބިގެން ނުވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ދުނިޔޭގެ އެކި ކަންކޮޅުތަކުން ހޮވާލެވޭ 'ބިއުޓީ ޕެޖެންޓުންގެ' މެދުގައި ބާއްވާ މިސް ޔުނިވާސް މުބާރާތާގައި ޝައިނާ ބައިވެރިވުމާ އެކު ސަރުކާރަށް ވަރަށް ބޮޑަށް ފާޑު ކިޔަމުންދާ މި ދަނޑިވަޅުގައި އެކްސްގައި ހިއްސާ ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދީނާއި ގައުމަށް ލިބޭނެ ހަގީގީ ރީތިނަމެއް، އުފަލެއް، ކާމިޔާބީއެއް ނެތް ކަމަށެވެ.
މާތް ﷲ ވަހީ ކުރެއްވި އާޔަތަކާއި މާނަ ހިމަނައިގެން ރައީސް ކުރެއްވި އެ ޕޯސްޓުގައި އިތުރަށް ވިދާޅުވީ "އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާތިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާތިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ."
މިސް ޔުނިވާސް އަށް ޝައިނާ ވާދަކުރާތީ އެކަން ހުއްޓައިލުމަށް ގޮވާލައި ސަރުކާރުން ވަނީ އެކަން ކުށްވެރި ވެސް ކޮށްފައެވެ. އެކަމާ ގުޅިގެން ޔޫތް މިނިސްޓްރީން މިއަދު ނެރުނު ބަޔާނުގައި ބުނީ ދިވެހިން ގަބޫލު ކުރާ އާންމު އަހުލާގީ މިންގަނޑު ތަކާ މުޅިން ހިލާފަށް ރާއްޖެ ތަމްސީލު ކުރުމުގެ ނަމުގައި ދިވެއްސަކު އެފަދަ ހަރަކާތަށް ދިޔުމަކީ ސަރުކާރުން ކުށްވެރި ކުރާ ކަމެއް ކަމަށެވެ.
މިކަމުގައި އާންމުންގެ ހިޔާލު ވަނީ ދެކަފި ވެފައެވެ. އެގޮތުން ބައެއް އާންމުން އަދި ބައެއް ދީނީ އިލްމުވެރިން އެކަމާ ދެކޮޅަށް އަޑު އުފުލަމުން ދާއިރު އަނެއް ބަޔަކު ވަކާލާތު ކުރަމުންދަނީ މިސްޓާ މޯލްޑިވްސް ބޮޑީ ބިލްޑް ފަދަ މުބާރާތްތައް ރާއްޖޭގައި ބާއްވާއިރު ރީތީގެ ރާނީގެ މަގާމުގައި އަންހެނުންނަށްވެސް އެ ހަމަހަމަކަން ދޭން ޖެހޭނެ ކަމަށެވެ.
