ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް)ގެ އޮޑިޓް ރިޕޯޓާ ބެހޭގޮތުން މީޑިޔާ ތަކުގައި ދައުރުވަމުންދާ ހަބަރަކީ ސައްހަ ހަބަރެއް ނޫން ކަމަށް އެ ކުންފުނިން ބުނެއެވެ.
އެ ކުންފުނިން މިއަދު ނެރުނު ކުރު ބަޔާނެއްގައި ބުނީ، ކުންފުނީގެ މާލީ ހިސާބުތަށް ތައްޔާރު ކުރުމަށްޓަކައި އެ ކުންފުނިން އަބަދުވެސް، އޮޑިޓަރުންނަށް ފުރިހަމަ އެއްބާރުލުން ދޭކަމަށެވެ.
އަދި ޕީސީބީގެ އެނުއަލް ފައިނޭންޝަލް ރިވިއުގައި ފާހަގަކޮށްފައިވާ ކަންކަމަކީ 2023 ވަނަ އަހަރުގެ ބަދަލުގައި 2021 ވަނަ އަހަރުގެ މާލީ ބަޔާނުގައި ފާހަގަ ކޮށްފައިވާ ކަންކަން ކަމަށް އެ ކުންފުނިން ވަނީ ބުނެފައެވެ. ހަމައެހެންމެ 2021 ވަނަ އަހަރުގެ އޮޑިޓް ރިޕޯޓް ފުރިހަމަ އަށް ނިންމާފައި ނުވަނީ އެ ކުންފުނީގެ ވެލިއުއޭޝަން އާ ގުޅުންހުރި މަސައްކަތްތަކެއްގެ ސަބަބުން ކަމަށް އެ ކުންފުނީގެ ބަޔާނުގައި ވަނީ ބުނެފައެވެ.
މީގެ އިތުރުންވެސް އެއާޕޯޓްތަކުގެ ބިމުގެ ރަޖިސްޓްރޭޝަންތައް މިއަދާ ހަމައަށް ވެސް އެ ކުންފުންޏަށް ލިބިފައި ނުވާކަން ފާހަގަކޮށް އެ ކުންފުނިން ބުނީ، އެ ކަމަކީ 100 ޕަސެންޓް އެ ކުންފުނީގެ ބާރުގެ ދަށުގައިވާ ކަމެއް ނޫންކަމަށެވެ. އަދި ރަޖިސްޓްރޭޝަންތަށް ހޯދުމަށްޓަކައި ކުރަންޖެހޭ އެންމެހާ ކަންކަން މިހާރު ވެސް އެ ކުންފުނިން ކުރަމުންދާ ކަމަށް އެ ބަޔާނުގައި ވަނީ ބުނެފައެވެ.
ޕީސީބީން އިއްޔެ ނެރުނު އަހަރީ މާލީ ރިވިއުގައި ބުނެފައިވާ ގޮތުން އާރްސީއެލް އިން ވަނީ 2022 ވަނަ އަހަރު އަދި 2023 ވަނަ އަހަރުގެ އޮޑިޓް ރިޕޯޓު ފުރިހަމަ ނުކޮށެވެ. އެއާއެކު ޕީސީބީން ވަނީ ރިޕޯޓިންގެ ފެންވަރު މަތިކުރުމަށް އެ ކުންފުންޏަށާއި އިތުރު ކުންފުނިތަކަށް ނަސޭހަތްތެރި ވެފައެވެ.
