ސަރުކާރު ކުންފުނިތަކުގައި މަސައްކަތްކުރާ މުވައްޒަފުންގެ ތެރެއިން ޕްރޮފެޝަނަލް މުވައްޒަފުންގެ މުސާރައަށް ބަދަލެއް ނާންނާނެ ކަމަށް، ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ހިތަދޫ މެދު ދާއިރާގެ މެންބަރު އަހްމަދު އަޒާންގެ ސުވާލަށް ޖަވާބުދެއްވަމުން މާލިއްޔަތު ކޮމިޓީގައި ވާހަކަ ދައްކަވަމުން މިނިސްޓަރު މިއަދު ވިދާޅުވީ، ޕްރޮފެޝަނަލް މުވައްޒަފުންގެ މުސާރައަށް ބަދަލެއް ނާންނާނެ ކަމަށާއި، ރައީސް ޑރ. މުހައްމަދު މުއިއްޒު ވެސް އެގޮތަށް ނިންމަވާފައިވާ ކަމަށެވެ.
މިނިސްޓަރު ވިދާޅުވީ، ޕްރޮފެޝަނަލް މުވައްޒަފުންގެ މުސާރަ ކުޑަކޮށްފިކަމަށް ވާ ނަމަ، އެ މުވައްޒަފުންނަށް ރަނގަޅު އެހެން ފުރުސަތުތައް ލިބިއްޖެ ނަމަ ސަރުކާރު ކުންފުނިތައް ދޫކޮށް އެ މުވައްޒަފުން ދިއުމުގެ ސަބަބުން ކުންފުނިތައް ހިންގުމަށް ދަތިވާނެ ކަމަށެވެ.
ރައީސްގެ މުސާރައިން 50 ޕަސެންޓު އުނިކުރައްވަން ނިންމަވައި، ސިޔާސީ މުވައްޒަފުންގެ މުސާރަތަކުން 10 ޕަސެންޓު އުނިކުރަން ނިންމަވައި އެމަނިކުފާނު އެކަން އިއުލާނުކުރެއްވީ މިދިޔަ ބުދަ ދުވަހުގައެވެ.
'އެކްސް'ގައި ރައީސް އެ ދުވަހު ލިޔުއްވިގޮތުގައި:
- މި ފިޔަވަޅުތައް އަޅަނީ ދެ އަހަރު ދުވަހުގެ މުއްދަތަކަށް
- އެގޮތުން ސިޔާސީ މުވައްޒަފުންނާއި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަތަކުން 10 ޕަސެންޓް އުނިކުރާނެ
- ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000 ރުފިޔާގެ މުސާރައެއް
- މިނިވަން މުއައްސަސާތަކުގެ އިސްވެރިންގެ މުސާރައިން 10 ޕަސެންޓް އުނިކުރުމަށް ކަމާބެހޭ ފަރާތްތަކަށް ހުށަހަޅަން ނިންމަވާފައިވޭ
- ޝަރުއީ ދާއިރާގެ އިސްވެރިންނާއި ރައްޔިތުންގެ މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރުމަށް އެ ފަރާތްތަކުގައި އެދިވަޑައިގަންނަވާނެ
- ނަމަވެސް 12،000 ރުފިޔާ އިން ދަށުން މުސާރަ ލިބޭ ފަރާތްތައް އިސްތިސްނާ ވާނެ
