މާލޭ ގެއަކަށް މީހަކު ވައްދައި އޭނާއަށް ބިރު ދައްކާ، ފޭރުނު މައްސަލައިގައި 3 މީހެއްގެ މައްޗަށް ޕްރޮސެކިއުޓާ ޖެނެރަލްގެ އޮފީހުން ދައުވާކޮށްފިއެވެ.
މި ހާދިސާ ހިނގާފައި ވަނީ މިދިޔަ ޖުލައި މަހުގެ 24 ވަނަ ދުވަހުގެ ވަގުތެއްގައި ދިލްބަހާރުމަގު މއ. މަސްފަންގޭގައެވެ.
މި މައްސަލައިގައި ދައުވާ ކުރަނީ މއ. މަސްފަން، އުމުރުން 43 އަހަރުގެ އާއިޝަތު އަދި މއ. މަސްފަން، އުމުރުން 27 އަހަރުގެ މުހައްމަދު ރީހާންގެ އިތުރުން ސ. ހިތަދޫ / ސޯމާ، އުމުރުން 35 އަހަރުގެ ޝަފީގު އިބްރާހީމްގެ މައްޗަށެވެ.
ޕީޖީއިން މި 3 މީހުންގެ މައްޗަށް ކުރާ ދައުވާތައް:
- އަނިޔާއެއް ދިނުން
- އެނގިހުރެ ހުއްދަނޫން ގޮތެއްގައި މަޢުލޫމާތު ހޯދުން
- ފޭރުން
ޕީޖީ އޮފީހުން ބުނީ ދިލްބަހާރުމަގު މއ. މަސްފަން ގެ ކައިރީގައި ހުރި މީހަކަށް ގޮވައި އޭނާ މަސްފަންއަށް ވައްދައި ވަޅިން ބިރު ދައްކާ އޮރިޔާންކޮށް، އަނިޔާކޮށް އޭނާގެ ފޯނު އަތުލައި އޭނާގެ އެކައުންޓުން ފައިސާ ޓްރާންސްފާ ކުރުމުގެ އިތުރުން އޭނާގެ ކޭޝް ކާޑް ބޭނުންކޮށްގެން އޭޓީއެމްއިން ފައިސާ ނަގާފައިވާ މައްސަލައިގައި ދައުވާ ކުރުމަށް މިދިޔަ މަހުގެ 23 ވަނަ ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.
މި 3 މީހުންގެ މައްޗަށް ދައުވާކުރުމާ މެދު ގޮތެއް ނިންމައިދިނުމަށް އެދި ޕީޖީ އޮފީހަށް ފޮނުވާފައިވަނީ މިދިޔަ މަހުގެ 9 ވަނަ ދުވަހުއެވެ.
