މާލޭގައި ބިދޭސީއެއްގެ އަތުން ގިނަ އަދަދެއްގެ ފައިސާ ފޭރުނު މައްސަލައިގައި ދެމީހަކު ހައްޔަރު ކޮށްފިއެވެ.
ފުލުހުން ބުނީ، މާލޭގެ ގުލާބީ ގޯޅީގައި ދެމީހަކު ވެގެން ބިދޭއެއްގެ އަތުން ފޭރުނު މައްސަލައެއް ރޭ ދަންވަރު 2"12 ހާއިރު ރިޕޯޓްކޮށްފައިވާ ކަމަށެވެ. އެ ދެމީހުން ބިދޭސީ މީހާގެ އަތުން ފޭރުނީ 33،500 ރުފިޔާ ކަމަށް ވެސް ފުލުހުން ބުނެއެވެ.
މި މައްސަލައިގައި ދެމީހަކު ހައްޔަރު ކޮށްފައިވާ އިރު އެ ދެމީހުންނަކީ މާލެ، ހ. ރެދަން، ފަވާޒް ކަޅު ތުއްތު އާއި ތ. ތިމަރަފުށި، ލަކީ ހައުސް، ސޮފްވާން އަލީއެވެ. އެ ދެމީހުންނަކީ ވެސް އުމުރުން 36 އަހަރުގެ ދެ ފިރިހެނުން ކަމަށް ފުލުހުން ބުނެއެވެ.
މި މައްސަލަ ދަނީ އިތުރަށް ތަހުގީގު ކުރަމުންނެވެ.
މާލޭ ސަރަހއްދުގައި ކުށުގެ މައްސަލަތަކަށް ބަލާއިރު މިދިޔަ އަހަރު އެންމެ ގިނައިން ފުލުހުންނަށް ރިޕޯޓްކޮށްފައި ވަނީ ވައްކަމުގެ މައްސަލައެވެ. މިއަހަރުގެ މިހާތަނަށް ވެސް އެންމެ ގިނައިން ފުލުހުންނަށް ހުށަހަޅާފައި ވަނީ ވައްކަމާއި ފޭރުމުގެ މައްސަލައެވެ. މި އަހަރު ތެރޭ ވައްކަމުގެ 201 މައްސަލަ ރިޕޯޓްކޮށްފައިވާ އިރު، ފޭރުމުގެ 17 މައްސަލަ ވަނީ މިހާތަނަށް ރިޕޯޓްކޮށްފައެވެ.
