މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އާއި އެގްރޯނެޓް ކޯޕަރޭޝަން އުވާލުމަށް ސަރުކާރުން ނިންމައިފިއެވެ.
ސަރުކާރުގެ ދެ ކުންފުނި ކަމަށްވާ އެމްއައިޓީޑީސީ އާއި އެގްރޯނެޓް ކޯޕަރޭޝަން އުވާލަން ނިންމީ ހަރުދުތައް ކުޑަކުރުމުގެ ފިޔަވަޅެއްގެ ގޮތުގައި، ސަރުކާރުގެ ކުންފުނިތަކަށް ބަދަލުތަކެއް ގެނައުމަށް މިދިޔަ އާދީއްތަ ދުވަހު ކެބިނެޓުން ފާސްކުރި ނިންމުންތަކުގެ ތެރެއިންނެވެ.
ރައީސް އޮފީހުން ބުނީ މެދު ފަންތީގެ ޓޫރިޒަމް ޕްރޮޕަޓީތައް ތަރައްގީކުރުމަށް ރައީސް އަބްދުﷲ ޔާމީންގެ ސަރުކާރުގައި އުފެއްދި އެމްއައިޓީސީ އުވާލުމަށް ފަހު، އެ ކުންފުންޏަށް ހަވާލުކޮށްފައިވާ މަސައްކަތްތަކާ، މަޝްރޫއުތައް ބަދަލުކުރަން ނިންމީ މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އަށް ކަމަށެވެ.
ދަނޑުވެރިކަން ކުރިއަރުވާ ދަނޑުވެރިންގެ އުފެއްދުންތައް މާކެޓުކޮށް ވިއްކުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުގައި އުފެއްދި އެގްރޯނެޓް އުވާލުމަށް ފަހު، އެ ކުންފުނީގެ މަސައްކަތްތައް ބަދަލު ކުރަން ނިންމީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކުންފުންޏަށް ކަމަށް ރައީސް އޮފީހުން ވަނީ ބުނެފައެވެ.
އިތުރަށް ރައީސް އޮފީހުން ބުނީ އެ ކުންފުނިތައް އުވާލުމުގެ މަސައްކަތް މިއަހަރު ނިމުމުގެ ކުރިން ނިންމުމަށް، ވަޒީރުންގެ މަޖިލީހުން ނިންމާފައިވާ ކަަމަށެވެ.
