ސަރުކާރުގެ ސިޔާސަތުތަކަށް އައި ބަދަލާއެކު އެގްރޯ ނޭޝަނަލް ކޯޕަރޭޝަން (އެގްރޯނެޓް) މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސަބްސިޑިއަރީ ކުންފުންޏެއްގެ ގޮތުގައި ހަމަޖައްސާ، އެ ކުންފުނީގެ އިސް މަގާމުތަކަށް ބޭފުޅުން އައްޔަންކޮށްފިއެވެ.
މިފްކޯގެ ޑިރެކްޓަރުންގެ ބޯޑުން ނިންމަވާފައިވަނީ:
- އެގްރޯނެޓްގެ ޗެއާމަން: މުހައްމަދު އަނަސް
- އެގްރޯނެޓްގެ މެނޭޖިން ޑިރެކްޓަރު: މުހައްމަދު ސިނާން
މި ބަދަލާ ގުޅިގެން މިފްކޯއިން ނެރުނު ބަޔާނެއްގައި ބުނެފައިވަނީ، އެގްރޯނެޓްގެ އާ ހިންގުންތެރިންނަށް މަރުހަބާ ކިޔާ ކަމަށާއި، ދަނޑުވެރިކަމާއި މަސްވެރިކަމުގެ ދާއިރާ ގުޅުވާލައިގެން ދެ ދާއިރާއަށްވެސް ބޮޑު ކުރިއެރުމެއް ހޯދައިދިނުމަށް އެގްރޯނެޓާއެކު ގާތުން މަސައްކަތް ކުރާނެ ކަމަށެވެ.
އަދި އާ މެނޭޖުމަންޓާއެކު އެގްރޯނެޓްގެ ހިންގުން އިތުރަށް ހަރުދަނާވެ، ކުންފުންޏަށް އާ ދިރުމެއް ލިބިގެންދާނެ ކަމަށް އުންމީދުކުރާ ކަމަށް ވެސް މިފްކޯއިން ފާހަގަކުރިއެވެ.
އެގްރޯ ނޭޝަނަލް ކޯޕަރޭޝަން (އެގްރޯނެޓް) އަކީ ރާއްޖޭގައި ދަނޑުވެރިކަން ފުޅާކޮށް، ދަނޑުވެރިން އުފައްދާ ތަކެއްޗަށް ހަމަ އަގު ހޯދައިދިނުމަށާއި މާކެޓްކުރުމަށްޓަކައި 2020 ވަނަ އަހަރު އުފެއްދި ކުންފުންޏެކެވެ.
ކުރިން މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) ގެ ސަބްސިޑިއަރީއެއްގެ ގޮތުގައި ހިންގަމުން އައި މި ކުންފުނި، މިފްކޯގެ ދަށަށް ބަދަލުކުރަން ސަރުކާރުން ނިންމެވީ ސަރުކާރު ކުންފުނިތަކުގެ ހިންގުން ހަރުދަނާކޮށް، ހަރަދުތައް ކުޑަކުރުމަށް ކުރިއަށްގެންދާ އިސްލާހީ ފިޔަވަޅުތަކުގެ ތެރެއިންނެވެ.
