މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަކީ ޒަމާނީ ސެންޓްރަލް ބޭންކަކަށް ހެދުމުގެ ބޭނުމުގައި އެ އިދާރާގެ ހިންގުމުގެ އޮނިގަނޑަށް ބޮޑު ބަދަލުތަކެއް ގެނެސްފިއެވެ.
އެމްއެމްއޭގެ ހިންގުން ހަރުދަނާކުރުމަށް ފަސް މެނޭޖިން ޑިރެކްޓަރުން ކަނޑައަޅަން އެމްއެމްއޭގެ ބޯޑުން ފާސްކޮށްފައިވާއިރު، އެސިސްޓެންޓް ގަވަރުނަރުގެ މަގާމު، މެނޭޖިން ޑިރެކްޓަރުގެ މަގާމަށް ބަދަލުކުރަންވެސް ވަނީ ފާސްކޮށްފައެވެ. އެމްއެމްއޭއަށް ގެނައި އިތުރު ބަދަލުތަކުގެ ތެރޭގައި
- އެމްއެމްއޭގެ މެނޭޖިން ޑިރެކްޓަރުގެ މަގާމަށް ކުރިމަތިލުމަށް އާންމުކޮށް އެންމެންނަށް ހުޅުވާލާއިރު އެމްއެމްއޭގެ މުވައްޒަފުންނަށް ވެސް ކުރިމަތިލެވޭނެއެވެ.
- މެނޭޖިން ޑިރެކްޓަރުންނަށް ތިބެވޭނީ ފަސް އަހަރުގެ ދެ ދައުރުގެ މުއްދަތަކަށެވެ.
- މިހާރު ތިއްބެވި އެސިސްޓެންޓް ގަވަރުނަރުން އެޑްވައިޒަރުންގެ މަގާމަށް ވަނީ ޕްރޮމޯޓް ކޮށްފައެވެ.
އެމްއެމްއޭގެ ހިންގުމުގެ އުސޫލުތައް ހަރުދަނާކޮށް، މި ބަދަލުތައް ގެންނަން ނިންމެވީ އެމްއެމްއޭގެ ބޯޑުގެ މަޝްވަރާގެ މަތިން އާ ގަވަރުނަރެވެ. މި ބަދަލުތައް ގެންނަން އެމްއެމްއޭގެ ބޯޑުން ފާސްކުރީ އާ ގަވަރުނަރު އަދި ކުރީގެ ފިނޭންސް މިނިސްޓަރު މުނައްވަރު އެ މަގާމާ ހަވާލުވެވަޑައިގެންނެވިތާ މާގިނަ ދުވަހެއް ނުވެއެވެ.
