މިދިޔަ އަހަރު ތެރޭގައި ހަލާކުވެފައިވާ ފައިސާގެ 391،957 ނޫޓު ނައްތާލާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.
އެމްއެމްއޭއިން ބުނީ މިދިޔަ އަހަރުތެރޭގައި ނައްތާލާފައިވާ ނޫޓުތަކުގެ ފައިސާގެ އަގަކީ 22،911،960 ރުފިޔާ ކަމަށެވެ.
މިދިޔަ އަހަރުތެރޭގައި ނައްތާލާފައިވާ ފައިސާގެ ނޫޓުގެ މައުލޫމާތު:
- 1000 ރުފިޔާގެ ނޫޓު : 0.4 ޕަސެންޓު
- 500 ރުފިޔާގެ ނޫޓު : 3.2 ޕަސެންޓު
- 100 ރުފިޔާގެ ނޫޓު : 19 ޕަސެންޓު
- 50 ރުފިޔާގެ ނޫޓު : 19.7 ޕަސެންޓު
- 20 ރުފިޔާގެ ނޫޓު : 39.9 ޕަސެންޓު
- 10 ރުފިޔާގެ ނޫޓު : 13.5 ޕަސެންޓު
- 5 ރުފިޔާގެ ނޫޓު : 4.3 ޕަސެންޓު
މިހާރު ރާއްޖޭގައި ބޭނުން ކުރާ ކަރުދާސް ނޫޓަކީ ރާއްޖޭގެ މިނިވަން ކަމަށް 50 އަހަރު ފުރުމާ ދިމާކޮށް، 2016 ވަނަ އަހަރު ނެރުނު ރަން ދިހަ ފަހެއްގެ ނޫޓެވެ. އެ ކަރުދާހުގެ ގޮތުގައި 5، 10، 20، 50، 100، 500 އަދި 1،000 ރުފިޔާގެ ނޫޓު ވަނީ ނެރެފައެވެ.
ރަންދިހަ ފަހެއް ނޫޓް ސީރީޒް ބޭނުންކުރަން ފަށާފައި ވަނީ ޖެނުއަރީ، 26، 2016 ގައެވެ.
މިހާރު ރާއްޖޭގައި ބޭނުން ކުރާ ރަންދިހައެއްގެ ނޫޓްތަކަކީ ކުރިން ބޭނުންކުރި ނޫޓް ސީރީޒްތަކުގެ ނޫޓްތަކާ ހިލާފަށް ރައްކާތެރި، ގެންގުޅެން ފަސޭހަ އަދި ޒަމާނީ ނޫޓްތަކެކެވެ. މި ނޫޓްތަކަކީ އަލްޓްރާ ވައިލެޓް އަލި އެޅުވުމުން ސީރިއަލް ނަމްބަރު ދިއްލޭ ގޮތަށް ފަރުމާކޮށްފައިވާ ނޫޓުތަކެކެވެ.
އަލްޓްރާ ވައިލެޓް އަލީގައި ނޫޓްގެ މޫނުމަތީ އަގު ގޮޅިއެއްގައި ދިއްލިފައި ހުންނަ އިރު، މިއީ އާދައިގެ އަލީގައި ފެންނާނެ އެއްޗެއް ނޫނެވެ. ރަންދިހަ ފަހެއްގެ ނޫޓް ސީރީޒްގެ ނޫޓްތަކަކީ، ލޮލަށް ނުފެންނަ ފަރާތްތަކަށް އެ ނޫތް ދެނެގަނެވޭ ގޮތަށް ފަރުމާ ކޮށްފައިވާ ނޫޓުތަކެކެވެ.
