އިޒްރޭލުން ގަދަކަމުން ވަޒަންވެރިވެގެން އުޅޭ ގޯލާންގެ އުސްބިންތަކަށް އަމާޒުކޮށް ދިން ރޮކެޓް ހަމަލާއެއްގައި 12 މީހަކު މަރުވުމުން ބަދަލު ހިފަން ރޭ އިޒްރޭލުން ލުބުނާނަށް ވަރުގަދަ ހަމަލާއެއް ދީފިއެވެ.
ބޮން އަޅާ ބޯޓުތަކުން ގޮސް ދިން މިހަމަލާގައި ހިޒްބުއްލޯގެ ލީޑަރަކު އަވަހާރަ ކޮށްލި ކަމަށް އިޒްރޭލުން ބުނެފައިވާ އިރު ހިޒްބުއްލޯ އިން ބުނީ އެ ހަމަލާގައި ލީޑަރު ފުއާދު ޝުކުރު އަވާހާރަވެފައި ނުވާ ކަމަށެވެ.
އިޒްރޭލުން މިހަމަލާ ދިނީ ލުބުނާނުގެ ވެރަރަށް ބެއިރޫތުގައި ހިޒްބުއްލޯ އިން ކޮންޓްރޯލް ކުރާ ބައިބޯ ސަރަހައްދަކަށެވެ. ދާހިޔާގެ ނަމުން ނަން ދީފައިވާ އެ ސަރަހައްދަކީ ހިޒްބުއްލޯ ޖަމާއަތަށް ނިސްބަތްވާ ގިނަ ބަޔަކު ދިރިއުޅޭ ކާރޫބާރޫ ބޮޑު ސަރަހައްދެއް ނަމަވެސް އިޒްރޭލުގެ ހަމަލާ އަމާޒު ކުރީ, އިޒްރޭލުން ބުނާ ލީޑަރު ދިރިއުޅުއްވި އިމާރާތުގެ އެޕާޓުމަންޓަކަށެވެ.
އިޒްރޭލުން ބުނަނީ ގޯލާންގައި ދިރިއުޅޭ އިޒްރޭލު މީހުންނަށް އަމާޒުކޮށް ރޮކެޓް ހަމަލާ ދިނުމުގެ ފަހަތުގައި ހުންނެވީ ފުއާދު ކަމަށެވެ. ނަމަވެސް ހިޒްބުއްލޯ އިން ވަނީ, އެ ހަމަލާގައި އެޖަމާއަތުގެ އެއްވެސް ބައިވެރިވުމެއް ނުވާކަމަށް މީގެ ކުރިން ބުނެފައެވެ.
އެކަކު މަރުވި މިހަމަލާ އާ ގުޅިގެން ބަދަލު ހިފާނެ ކަމަށް ހިޒްބުއްލޯގެ ބައެއް މެންބަރުން ބުނަމުން ދާ އިރު, އިޒްރޭލުން މިހަމާ ދިނުމުގެ އިރުކޮޅެއްގެ ކުރިން ހިޒްބުއްލޯ އިން އިޒްރޭލަށް އަމާޒުކޮށް ރޮކެޓް ހަމަލާއެއް ދިނެވެ. އެ ހަމަލާ އަމާޒު ކުރީ އިޒްރޭލުގެ އަސްކަރިއްޔާއިން ގާއިމުވެ ތިބޭ ސަރަހައްދަކަށް ކަމަށް ވާ އިރު އެ ހަމަލާގައި ސިފައިންގެ މީހަކު މަރުވިއެވެ.
މި ފުއާދަކީ, ހިޒްބުއްލޯގެ ލީޑަރު ހަސަން ނަސްރުއްاللهގެ އެޑްވައިޒަރެއް ކަމަށް އެމެރިކާ އިން ބުނެއެވެ. އަދި ބެއިރޫތުގައި ހުރި އެމެރިކާގެ އަސްކަރިއްޔާގެ މަރުކަޒަކަށް 1983 ގައި ދިން ހަމަލާގެ ފަހަތުގައި ހުރީވެސް އޭނާކަމަށް މީގެ ކުރިން އެމެރިކާއިން ބުނެ އޭނާ އާ ބެހެ މައުލޫމާތު ފޯރުކޮށްދޭ ފަރާތަކަށް 5 މިލިއަން އެމެރިކާ ޑޮލަރުގެ އިނާމެއްވެސް ހުށަހެޅިއެވެ.
ބެރިރޫތުގެ އެ ހަމަލާގައި އެމެރިކާ ސިފައިންގެ 241 މީހަކު އޭރު ވަނީ މަރުވެފައެވެ.
މި ހަމަލާއަށް ވަހު ވައިޓްހައުސްގެ ތަރުޖަމާން ކެރައިން ޖީން ޕިއޭރޭ ވިދާޅުވީ, ހިޒްބުއްލޯ އާއި އިޒްރޭލާ ދެމެދު ބޮޑު ހަނގުރާމައެއް ފެށެން ރައީސް ޖޯ ބައިޑަން ބޭނުންފުޅު ނުވާ ކަމަށެވެ.
ހިޒްބުއްލޯއިން ވެސް އިޒްރޭލާއެކު ފުޅާ ހަނގުރާމައެއް ކުރާކަށް ބޭނުމެއް ނުވެއެވެ. ނަމަވެސް އިޒްބުއްލީގެ މިވަގުތުގެ އަމާޒަކީ, އިޒްރޭލުން ގާޒާއަށް ދެމުން ގެންދާ ހަމަލާތަކާ ގުޅިގެން, އިޒްރޭލަށް ޕްރެޝާ ބޮޑުކުރުމާއެކު, ހަމައެކަނި ގާޒާއަށް ފޯކަސް ކުރަން ފުތުސަތު ނުދިނުމެވެ.
