މަރުކަޒީ ބޭންކް، އެމްއެމްއޭގެ ގަވަރުނަރުކަމަށް ކުރީގެ ފިނޭންސް މިނިސްޓަރު އަހްމަދު މުނައްވަރު އައްޔަންކުރަން ފެނިވަޑައިގަންނަވާ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފިއެވެ.
އެމްއެމްއޭގެ ގަވަރުނަރުކަމުން އަލީ ހާޝިމް ވަކިކުރައްވައި، މިވަގުތު ފިނޭންސް މިނިސްޓަރުގެ އެޑްވައިޒަރުގެ މަގާމުގައި ހުންނެވި މުނައްވަރު ގަވަރުނަރުކަމަށް އައްޔަންކުރަން ރައީސް ޑރ. މުހައްމަދު މުއިއްޒު ފޮނުއްވީ މިދިޔަ އަންގާރަ ދުވަހުގައެވެ.
މާލިއްޔަތު ކޮމިޓީގެ މިއަދުގެ ބައްދަލުވުމުގައި ދެ ގަޑިއިރު ވަންދެން ކޮމިޓީގެ މެންބަރުން މުނައްވަރާ އިންޓަވިއުކުރެއްވުމަށް ފަހު، 70 އަށް ވުރެ ގިނަ މާކްސް ލިބިވަޑައިގަތް ކަމަށް ވިދާޅުވެ އެ މަގާމަށް އޭނާ އައްޔަންކުރަން ފެންނަ ކަމަށް ހުށަހެޅުއްވީ ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމެވެ.
މުނައްވަރަށް އެވަރެޖްކޮށް ލިބިވަޑައިގަތީ 94.73 މާކުހެވެ.
އެހެންކަމުން ކޮމިޓީގައި އެވަގުތު ތިއްބެވި މެންބަރުންގެ އިއްތިފާގުން ވަނީ މުނައްވަރު ގަވަރުނަރުކަމަށް އައްޔަންކުރަން ނިންމައިފައެވެ. އެކަމަކު މުނައްވަރު އެ މަގާމަށް އައްޔަންކުރަން ރައީސަށް ލަފާ އެރުވޭނީ ރައްޔިތުންގެ މަޖިލީހުން ރުހުން ލިބިގެންނެވެ.
