ސްޓެލްކޯއިން ދޭ ހިދުމަތް ހީނަރުވެއްޖެނަމަ ދިވެހި ދައުލަތުގެ އިގުތިސޯދީ މިނިވަންކަން ހީނަރުވާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
ފަހުމީ މިފަދައިން ވިދާޅުވީ ދައުލަތަށް ގިނަ ދުވަހު ހިދުމަތް ކުރައްވައިގެން ޝަރަފާއި މެޑަލް ހާސިލްކުރި ސްޓެލްކޯގެ 16 މުވައްޒަފުންގެ ޝަރަފުގައި އާދީއްތަ ދުވަހު ސްޓެލްކޯގެ ހެޑް އޮފީހުގައި ބޭއްވި ހާއްސަ ހަފްލާގައި ވާހަކަ ދައްކަވަމުންނެވެ.
ފަހުމީ ވިދާޅުވީ ސްޓެލްކޯއިން ދޭ ހިދުމަތް ހީނަރުވެއްޖެނަމަ ދިވެހި ދައުލަތް ހީނަރުވެ، ދިވެހި ދައުލަތުގެ އިގުތިސޯދީ މިނިވަންކަން ހީނަރުވާނެ ކަމަށެވެ. އަދި ކަރަންޓާއި ނުލައި ގައުމުގެ އިގުތިސޯދީ މިނިވަންކަން ޔަގީން ނުކުރެވޭނެ ކަމަށެވެ.
ކުންފުނީގެ ހިދުމަތް އިތުރަށް ފުޅާކޮށް، އިތުރު ފުރިހަމަ ކަމާއިއެކު ރައްޔިތުންނަށް ހިދުމަތް ފޯރުކޮށްދިނުމަށް ހުރިހާ މުވައްޒަފުން ވެސް އެއްވެސް ހީނަރުކަމެއް ނެތި މަސައްކަތް ކުރުމަށް ފަހުމީ ވަނީ އިލްތިމާސްކުރައްވާފައެވެ.
ފަހުމީ ވިދާޅުވީ މިހާތަނަށް ހިދުމަތް ކުރަމުން ދަނީ، އަދި މުސްތަގުބަލުގައި ހިދުމަތް ކުރާނީ ދިވެހި ދައުލަތަށ ކަމަށެވެ. އެހެންކަމުން ދިވެހި ދައުލަތަށް ހިދުމަތްކޮށްދިނުމުގައި ތިބެންވާނީ ފިސާރި ކެރިގެން ކަމަށާއި އެކަމުގައި ހީނަރުކަމެއް އައިސްގެން ނުވާނެ ކަމަށެވެ.
