ސަރުކާރުން މި ގައުމުގެ އިގްތިސާދު ރަނގަޅު ކުރުމަށްޓަކައި ކުރަމުން އަންނަ މަސައްކަތްތަކަށް ތާއިދު ކުރަންޖެހޭ ކަމަށާއި ތަފާތު ވާހަކަދައްކައިގެން ރައްޔިތުންގެ ބޮލުގައި ތެތް ގޯނި އެޅުމުގެ މަސަައްކަތް ހުއްޓާލަން ޖެހޭކަމަށް ހެލްތް މިނިސްޓަރު ޑރ. އަބްދުﷲ ހަލީލު ވިދާޅުވެއްޖެއެވެ.
މިރޭ ޕީއެންސީ އިން ބޭއްވި ޖަލްސާގައި ހަލީލު ވިދާޅުވީ މި ސަރުކާރުން ފެށިގެން އައީވެސް 124 ބިލިއަން ރުފިޔާގެ ދަރަންޏަކާއެކުގައިކަމަށެވެ. އަދި އެކަން ހަމަ މަގަށް އަޅުވާނެ ވާހަކަ ރައީސް ވިދާޅުވިކަމަށާއި މިއަދު އަޅުއްވާ ކޮންމެ ފިޔަވަޅަކީވެސް އިގްތިސާދު ހަމަމަގަށް އެޅުވުމަށް އަޅާ ފިޔަވަޅެއް ކަމުގައެވެ. އަދި އެކަންކަން ހާސިލުނުކޮށް ބޭނުންވާ ތަރައްގީއާއި ހަމައަށް ނުދެވޭނެކަމަށް ހަލީލު ވިދާޅުވިއެވެ.
މީގެ އިތުރުން ހަލީލު ވިދާޅުވީ ރިޔާސީ އިންތިހާބުގެ ދުވަސްވަރުވެސް ރައީސް ޑރ.މުއިއްޒު ދެއްކެވީ ގައުމުގެ އިގްތިސާދު ރަނގަޅުކުރާނެ ވާހަކައާއި ގައުމު ހަމަ މަގަށް އަޅުވާނެ ވާހަކަ ކަމަށެވެ. އަދި މިއަދުވެސް ރައީސް ދައްކަވަމުން ގެންދަވަނީ އެ ވާހަކަތައްކަން ފާހަގަކުރައްވަމުން ހަލީލު ވިދާޅުވީ މިއަދު ފެނިގެންދަނީ އެ މަނިކުފާނުގެ އަމަލާ ބަހުން އެކަންކަން ތަންފީޒުކުރަމުން ގެންދަވާ މަންޒަރު ކަމަށެވެ. އަދި ފެނިގެން ދަނީ ގައުމުގެ އިގްތިސާދު ހަމަ މަގަށް އެޅުވުމަށްޓަކައި ގައުމުގައި ދޫވެފައިވާ މަޅިތައް ބާރުކޮށް، ރައްޔިތުންނަށް ރަނގަޅު ގޮތް ހޯއްދަވައިދެއްވުންކަމަށެވެ.
"އަޅުގަނޑުމެން އާއިލާއެއް ބަލަހައްޓަމުން އަންނައިރުވެސް ލިބޭ އާމްދަނީއަށްވުރެ އިތުރަށް ހަރަދުކުރަނީ. އަވަށްޓެރިޔާގެ ކިބައިންވެސް ލޯނު ލިބޭނީ ވަކިވަރަކަށް. އެހީތެރިކަންވެސް ހޯދޭނީ ވަކި ވަރަކަށް، ގެއަކަށް ލިބެނީ ދިހަ ހާސް ރުފިޔާގެ އާމްދަނީކަމުގައި ވަނީނަމަ އަޅުގަނޑުމެންގެ އާއިލާއިން ފަނަރަހާސް ރުފިޔާ ހަރަދުކުރަން އުޅުމުން ވާނެގޮތް މިދިޔަ ފަސް އަހަރު ދުވަހު މި ގައުމަށްވެފައި އޮތީ" އާންމު ދިރިއުޅުމުން މިސާލު ދައްކަމުން ހަލީލު ވަނީ ރާއްޖެއަށް ދިމާވި އިގްތިސާދީ ގޮންޖެހުންތައް ތަފްސީލުކޮށް ދެއްވާފައެވެ.
ރައީސް ޔާމީންއަށް ނުސީދާ ރައްދެއް ދައްވަމުން ހަލީލު ވިދާޅުވީ މިހާރު އިދިކޮޅު ފަރާތްތަކާއި އަދި ކުރިން ލީޑަރުންގެ ގޮތުގައި ބަލަމުން ގެންދިޔަ ބޭފުޅުން ވަރަށް ތަފާތު ވާހަކަދައްކަމުން އަންނަކަމަށެވެ. އަދި ސަރުކާރަށް ފާޑުކިޔުމުގައި ރައްޔިތުންނަށް އޮޅުވާލާ އެތައް ވާހަކައެއް ދައްކަމުން އަންނަކަން ފާހަގަކުރައްވަމުން ހަލީލު ވިދާޅުވީ ހާއްސަކޮށް އިގްތިސާދީ ކަންކަން އޮޅުވާލުމަށް ވަރަށް ބޮޑަށް މަސައްކަތްކުރަމުން އަންނަކަމަށެވެެ. "އެހެން ވިދާޅުވާއިރު އަޅުގަނޑު ހިތަށް އަރަނީ މި ގައުމުގެ ރައްޔިތުން ދެކެ ލޯބިވާކަމުގައި ވަންޏާ މިއަދު ނުކުމެ ވަޑައިގެން ކުރަންވީ ކަމަކީ ރައްޔިތުންނާއެކު ތިއްބެވުމުން. ރައްޔިތުން ބޭނުންވަނީ ހަމަ މަގަށް އަޅުވަން." ހަލީލު ވިދާޅުވިއެވެ.
މީގެ އިތުރުން ހަލީލު ވިދާޅުވީ ރިޔާސީ އިންތިހާބާއި މަޖިލީސް އިންތިހާބުގައި ރައްޔިތުންވަނީ އެކަން ސާބިތުކޮށްދީ ރައީސްއަށް ދެ މެންޑޭޓް އަރުވާފައިކަމަށެވެ. އެހެންކަމުން އެއަށްވުރެ ބޮޑު ވާހަކައެއް ނެތްކަމަށާއި، އެކަމަށް ތަބާވުމަށް ހަލީލުވަނީ ގޮވާލާފައެވެ.
