މާލޭގައި ގަވާއިދާ ހިލާފަށް ވިޔަފާރި ކުރަމުންދާ ބިދޭސީން އަތުލައިގަތުމަށް ހިންގަމުންދާ އޮޕަރޭޝަނުގެ ތެރެއިން ރޭ އަތުލައިގެން ބިދޭސީއަކު އިމިގްރޭޝަނުގެ ވެހިކަލުގައި ކޮޅުފައިން ޖެހުމުން ޑީޕޯޓު ކުރަން ނިންމައިފިއެވެ.
އިމިގްރޭޝަނުގެ ކޮންޓްރޯލާ މުހައްމަދު ޝައްމާން ވަހީދު ވިދާޅުވީ އެ ބިދޭސީ މީހާއާ މެދު ވީ އެންމެ އަވަހަކަށް އިމިގްރޭޝަން ގާނޫނުން ހަރުކަށި ފިޔަވަޅު އެޅުމަށްފަހު ޑީޕޯޓުކޮށްލެވޭނެ ކަމަށާއި، ގަވާއިދާ ހިލާފަށް އުޅޭ ބިދޭސީން ހޯދުމަށް ހިންގާ މި އޮޕަރޭޝަން ފަސް ޖެހުމެއް ނެތި އަދި ބިރަކަށް ސިހުމެއް ނެތި ކުރިއަށް ދާނެ ކަމަށެވެ.
އިމިގްރޭޝަނާއި ފުލުހުން ގުޅިގެން ސިލްސިލާކޮށް މާލެ ސަރަހައްދުގައި ހިންގަމުންދާ އޮޕަރޭޝަންގެ ތެރެއިން ރޭ އަތުލައިގަނެފައި ވަނީ މާލޭގައި ޓޭކްއަވޭ/ކެފޭ ހިންގަމުންދާ 4 ތަނެއް ބަލައި ފާސްކޮށެވެ.
މި ތަން ބަލާ ފާސްކޮށް އަތުލައިގަތް މީހުންގެ ތެރޭގައި ބިދޭސީ 6 ފިރިހެނަކާއި 1 އަންހެނެއް ހިމެނޭ ކަމަށް އިމިގްރޭޝަނުން ވަނީ މައުލޫމާތު ދީފައެވެ. އަދި މި މީހުންގެ ތެރޭގައި އިމިގްރޭޝަންގެ ވެހިކަލަށް ގެއްލުން ދިން މީހާވެސް ހިމެނެއެވެ.
މިދިޔަ މަހުން ފެށިގެން އިމިގްރޭޝަނުން ކުރިއަށް ގެންދަމުންދާ ހާއްސަ ރެއިޑް އޮޕަރޭޝަންގައި މިހާތަނަށް ވަނީ 100 އަށްވުރެ ގިނަ ބިދޭސީން ހައްޔަރުކޮށްފައެވެ.
އިމިގްރޭޝަން ގާނޫނުގެ 30 ވަނަ މާއްދާގެ ދަށުށް ރާއްޖޭގައި ބިދޭސީންނާއެކު މުއާމަލާތްތައް ހިންގާ ދިވެހިން މަސައްކަތްކުރުމުގެ ހުއްދަނެތް ބިދޭސީއަކު ލައްވާ ރާއްޖޭގައި އެއްވެސް މަސައްކަތެއް ކުރުވުމަކީ ކުށެކެވެ. އަދި މިފަދަ ފަރާތްތަކަށް ގާނޫނުގައި ބޮޑެތި އަދަބުތައް ވަނީ ކަނޑައެޅިފައެވެ. އެގޮތުން ގާނޫނުގެ 33 ވަނަ މާއްދާގެ (ށ) ގެ ދަށުން، 50,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކޮށް އެމީހެއްގެ ޕާސްޕޯޓު ވަކިމުއްދަތަކަށް ހިފެހެއްޓުމުގެ އިހްތިޔާރު، ކޮންޓްރޯލާ އޮފް އިމިގްރޭޝަނަށް ލިބިގެން ވެއެވެ.
