ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ވިލިމާފަންނު ދާއިރާގެ ކުރީގެ މެންބަރު އަހްމަދު ނިހާން ހުސައިން މަނިކު ހަމަޖައްސައިފިއެވެ.
މީޑިއާ އަށް ފޮނުވި މެސެޖެއްގައި ރައްޔިތުންގެ މަޖިލީހުގެ އިދާރާއިން ބުނީ، ނިހާން އެ އިދާރާގެ ބިއުރޯ ޗީފަކަށް މަޖިލީހުގެ ރައީސް އަބްދުއްރަހީމް އަބްދުﷲ އައްޔަންކުރެއްވީ ޕާލަމެންޓްރީ ސާވިސް ގަވައިދުގެ ދަށުން އަބްދުއްރަހީމްގެ މަސައްކަތްޕުޅަށް އެހީތެރިވުމުގެ ގޮތުން ކަމަށެވެ.
އެ އިދާރާއިން ބުނި ގޮތުގައި، ނިހާން މަސައްކަތަށް ނުކުމެވަޑައިގަންނަވަން ފެށްޓެވީ އިއްޔެއެވެ.
ނިހާން ވަނީ ވިލިމާފަންނު ދާއިރާގެ މެންބަރުކަން ކުރެއްވިއިރު، ޕީޕީއެމްގެ ޕާލިމެންޓްރީ ގްރޫޕްގެ ލީޑަރުކަން ކުރައްވައި، ޖުމްހޫރީ ޕާޓީގެ ކައުންސިލް މެންބަރުކަން ކުރެއްވުމުގެ އިތުރުން، އެ ޕާޓީގެ ލީޑަރު ގާސިމް އިބްރާހީމްގެ އެޑްވައިޒަރެއްގެ މަގާމުވެސް ފުރުއްވައިފައެވެ.
ނިހާންގެ ކުރިން ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ހުންނެވީ ކުރީގެ ރައީސް އިބްރާހީމް މުހައްމަދު ސާލިހުގެ ކޮއްކޯފުޅު ފާތިމަތު މުހައްމަދު ސާލިހެވެ.
