މި އަހަރުގެ ނިޔަލަށް ފުށިދިއްގަރުފަޅު (ރަސްމާލެ) ހިއްކާ ނިންމާލެވޭނެ ކަމަށާއި އެކަން ކުރުމަށް އިތުރު ފަރާތްތަކާ މަޝްވަރާތައް ކުރަމުންދާ ކަމަށް ބިނާރާބެހޭ ވަޒީރު ޑރ. އަބްދުﷲ މުއްތޮލިބު ވިދާޅުވެއްޖެ އެވެ.
މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ އެންމެ ބޮޑު މަޝްރޫއު ކަމަށްވާ ފުށިދިއްގަރުފަޅު ހިއްކުމުގެ މަޝްރޫއުގެ މަސައްކަތްތައް ފެށީ ޑިސެމްބަރު މަހުގެ 18 ވަނަ ދުވަހުއެވެ. ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ އަށް މަސް ދުވަހަށް ހަވާލުކޮށްގެން ކުރިއަށް ގެންދާ މި މަޝްރޫއުގެ ދަށުން ފުށިދިއްގަރުފަޅުން 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
ފުށިދިއްގަރު ފަޅު ހިއްކުމުގެ މަސައްކަތް ކުރުމަށް ދައުލަތުން ހަރަދެއް ކުރަން ނުޖެހޭއިރު އެ ސަރަހައްދު ހިއްކަނީ ބަދަލުގެ ގޮތުގައި ސީއެމްސީއަށް އެ ސަރަހައްދުން 70 ހެކްޓަރުގެ ބިން ދޭންޖެހޭ ގޮތަށެވެ. 50 އަހަރުގެ މުއްދަތަށް އެ ބިންތައް ދޫކޮށްފައިވާއިރު ބިންތައް ވިއްކައިގެ ލިބޭ ފައިސާ އެޗްޑީސީގެ އެކްސްކްރޯ އެކައުންޓަކަށް ޖަމާކުރުމުން ބިން ހިއްކޭ މިންވަރަކަށް ސީއެމްސީއަށް ފައިސާ ދޫކުރުމަށް ވަނީ އެއްބަސްވެފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ވާހަކަ ދައްކަވަމުން ވިދާޅުވީ ބިން ހިއްކުމުގެ މަސައްކަތް ކުރިއަށް ނުދަނީ ސީއެމްސީ ކުންފުންޏަށް ފައިސާ ނުހޯދިގެން ކަމަށެވެ. ނަމަވެސް އެކަމުގެ ސަބަބުން މަސައްކަތް މަޑު ނުޖެހޭނެ ކަން ފާހަގަ ކުރައްވާ މުއްތަލިބް ވިދާޅުވީ އެހެން ފަރާތްތަކާ މަޝްވަރާކޮށް ސަރުކާރުން މަސައްކަތް ކުރަނީ މިއަހަރުގެ ނިޔަލަށް ބިން ހިއްކާ ނިންމުމަށް ކަމަށެވެ.
"ސަރުކާރުން މަސައްކަތް ކުރަމުން މިގެންދަނީ، މިއަހަރުގެ ނިޔަލަށް މަސައްކަތް އެއްކޮށް ހިއްކާ ނިންމޭ ވަރަށް، ތަފާތު ގިނަ ފަރާތްތަކާ ގުޅިގެން މަސައްކަތް ކުރުމަށް،" މުއްތަލިބް ވިދާޅުވިއެވެ.
އަދި އެކަން ކުރުމަށް ސަރުކާރަށް ގިނަ ކާމިޔާބީ ތަކެއް ލިބިފައިވާ ކަމަށްވެސް މުއްތަލިބް ވިދާޅުވިއެވެ. އަދި އެހެން މޮޑެލްއެއް މެދުވެރިކޮށް ފައިސާ ހޯދުމުގެ މަސައްކަތް ސަރުކާރުން ފަށާފައިވާ ކަމަށާއި އޭގެ ތަފްސީލުތައް ވަރަށް އަވަހަށް ހާމަކުރައްވާނެ ކަމަށް އޭނާ ވިދާޅުވިއެވެ. މިފަދަ ގޮންޖެހުންތައް ކުރިމަތިވީ މިއަހަރުގެ ދައުލަތުގެ ބަޖެޓުގައި މި މަޝްރޫއު ހިންގުމަށް ހިމެނި ފައިސާ އުނިކުރުމުން ކަމަށް މުއްތަލިބް ވަނީ ވިދާޅުވެފައެވެ.
ފުށިދިއްގަރު ފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން 1153 ހެކްޓަރު ހިއްކަން ނިންމާފައިވާއިރު މި މަޝްރޫއުގެ ފުރަތަމަ ހިއްކާ 29 ހެކްޓަރު ބޭނުންކުރާނީ މަޝްރޫއުގެ ބޮޑެތި ފިޔަވަހިތައް ނިންމުމަށް ބޭސްއެއްގެ ގޮތުގައެވެ. ފުށިދިއްގަރު ފަޅުގައި ތަރައްގީކުރާ ރަސްމާލެ ތަރައްގީ ކުރާނީ ޒީރޯ ކާބަން، ސޭފް އައިލެންޑް ކޮންސެޕްޓަށެވެ.
