ނެޓްފްލިކްސްގެ ކާމިޔާބު ޝޯ "ސްޓްރޭންޖާ ތިންގްސް" ގެ އެލެވެންގެ ރޯލު ކުޅެ، އާންމުންގެ މެދުގައި ލޯބި ހޯދި ބަތަލާ މިލީ ބޮބީ ބްރައުން ކައިވެނިކޮށްފިކަމަށް މީޑިއާތަކުން ރިޕޯޓްކޮށްފިއެވެ.
މިލީ އޭނާގެ ލޯބިވެރިޔާ، ޖޭކް ބޮންޖޯވީއާ މިދިޔަ އަހަރު ފެބްރުއަރީ މަހު އެންގޭޖްވިއިރު ދެމީހުން އެންގޭޖްވިކަން ވަނީ ސޯޝަލް މީޑިއާގައި ހިއްސާކޮށްފައެވެ. އެއާއެކު ގިނަ ފޭނުންނަށް ޝޮކެއް ލިބުނުއިރު ގިނަ ބަޔަކު ދެމީހުންނަށް މަރުހަބާ ކިޔާ ކޮމެންޓްކޮށްފައިވެއެވެ. އުމުރުން 20 އަހަރުގެ މިލީ އާއި ޖޭކް 22 އަހަރު ސިއްރިއްޔާތުގައި ކައިވެނިކުރީ ނިމިދިޔަ ހަފްތާ ބަންދުގައި ޔުނައިޓެޑް ސްޓޭޓްސްގައެވެ. ދެމީހުން ކައިވެނިކުރިއިރު އެ ހަފްލާގައި ބައިވެރިވީ ހަމައެކަނި ދެފަރާތުގެ އާއިލާ ކަމަށާއި ހުރިހާ ލިޔެކުންތަކެއް ފުރިހަމަކުރުމަށްފަހު ބޮޑު ކައިވެނި ހަފްލާއެއް ބާއްވާނެ ކަމަށް މީޑިއާތަކުން ބުނެއެވެ.
ޖޭކް އަކީ ވެސް އެކްޓަރެކެވެ. އަދި މަޝްހޫރު ލަވަކިޔުންތެރިޔާ ޖޯން ބޮންޖޯވީގެ ދަރިފުޅުވެސްމެއެވެ. އިންސްޓަގްރާމް މެދުވެރިކޮށް ދެމީހުން ދިމާވިއިރު 2021 ވަނަ އަހަރު މިލީ ވަނީ އޭނާގެ ސޯޝަލް މީޑިއާގައި ޖޭކް އާއެކު ގިނަ ފޮޓޯތަކެއް ޕޯސްޓްކޮށްފައެވެ. އޭގެ ފަހުން ދެމީހުން ލޯބީގެ ގޮތުން ގުޅުނުކަން ހާމަކުރުމަށްފަހު ދެމީހުން އެންގޭޖްވީ މިދިޔަ އަހަރެވެ.
ބަތަލާ ދެން އެންމެ އަވަހަށް ފެނިގެންދާނީ ޖޯ ރުސޯގެ "ދަ އިލެކްޓްރިކް ސްޓޭޓް" އިންނެވެ. އޭނާ "ސްޓްރޭންޖާ ތިންގްސް" ގެ ފަހު ސީޒަނުން ވެސް ފެނިގެންދާނެއެވެ.
