ހޮލީވުޑްގެ މަޝްހޫރު ދެ ތަރިން ކަމަށްވާ ޓޮމް ހޮލޭންޑާއި ޒެންޑެޔާ އެންގޭޖްވެއްޖެއެވެ.
އިޓް ކަޕްލް" ގެ ނަމުން މަޝްހޫރުވެފައިވާ މިދެތަރިން އެންގޭޖްވެފައިވަނީ މިދިޔަ ކްރިސްމަސް ހޮލިޑޭ އާ ދިމާކޮށް ކަމަށް ދެމީހުންނާ ގާތް މީހަކާ ހަވާލާދީ މީޑިއާތަކުން ރިޕޯޓްކޮށްފައިވެއެވެ. އެމެރިކާގައި ދެމީހުން އެންގޭޖްވި ކަމަށް ހަބަރު ފެތުރުނު ނަމަވެސް ދެތަރިން ކުރެ އެކަކުވެސް އެކަމާ ގުޅޭ ގޮތުން އެއްވެސް އެއްޗެއް މިހާތަނަށް ބުނެފައެއް ނުވެއެވެ. ގޯލްޑެން ގްލޯބްސް އެވޯޑުގެ ރެޑްކާޕެޓަށް ޒެންޑެޔާ ދިޔައިރު އޭނާގެ ކަށި އިނގިލީގައި އަނގޮޓިއެއް އޮތުމުން ގިނަ ބަޔަކު ގަބޫލުކުރީ އެއީ އޭނާގެ އެންގޭޖްމަންޓް އަނގޮޓިކަމަށެވެ.
މި ދެތަރިން ލޯބީގެ ގޮތުން ގުޅުނީ "ސްޕައިޑަމޭން: ނޯވޭ ހޯމް" ގެ ސެޓުން ކަމަށް ބުނެއެވެ. 2016 ވަނަ އަހަރު ޝޫޓިން ފެށި މި ފިލްމުގެ ސެޓުން ދެމީހުން ދިމާވެ ވަރަށް ގާތް އެކުވެރިންނަށް ބަދަލުވެގެން ދިޔައެވެ. ފިލްމުގެ ޝޫޓިން އަށް ފަހު ދެތަރިން އެއްކޮށް ބައްދަލުކުރާ ތަން ޕަޕަރާޒީންގެ ކެމެރާތަކުގެ ލެންސަށް އަރާފައި ވާއިރު ޓޮމް އާއި ޒެންޑެޔާ ލޯބީގެ ގޮތުން ގުޅުނިގެން އުޅޭކަމަށް ރިޕޯޓު ކުރީ 2021 ވަނަ އަހަރުއެވެ. ދެމީހުން ލޯބީގެ ގޮތުން ގުޅުނު ހަބަރާއެކު ދެތަރިންގެ ފޭނުން ވަނީ ސޯޝަލް މީޑިއާގައި އުފާފާޅުކޮށްފައެވެ.
