ހޮލީވުޑްގެ މަޝްހޫރު ފިލްމު "ރޯމިއޯ އެންޑް ޖޫލިއަޓް" ފިލްމުގައި ޖޫލިއަޓްގެ ރޯލު ކުޅުނު މަޝްހޫރު ބަތަލާ އޮލިވިއާ ހަސީ މަރުވެއްޖެއެވެ.
އުމުރުން 73 އަހަރުގައި ބަތަލާގެ މަރާއެކު އޭނާއަށް ތާއީދުކުރާ ގިނަ ފޭނުން ހިތާމަފާޅުކުރަމުން އަންނައިރު މަޝްހޫރު ސެލެބްރިޓީން ވަނީ އޭނާގެ އާއިލާއަށް ތައުޒިޔާކިޔާފައެވެ. ބަތަލާގެ މަރާއެކު އޭނާގެ އާއިލާއިން ނެރުނު ބަޔާނުގައި ބުނީ އޮލީވިއާ މަރުވުމަކީ އާއިލާއަށް ލިބުނު ވަރަށް ބޮޑު ހިތާމައެއް ކަމަށާއި ބަތަލާއަކީ އެތައް ބައެއްގެ ހިތުގައި ބިންވަޅުނެގިފައި ހުރި ތަރިއެއްކަމަށެވެ. އަދި އޭނާގެ ހަނދާންތައް އަބަދުވެސް އެކުގައިވާނެކަމަށެވެ.
"ރޯމިއޯ އެންޑް ޖޫލިއަޓް" ކުޅުނު އިރު އޮލީވިއާގެ އުމުރަކީ އެންމެ 15 އަހަރެވެ. އެ ފިލްމުގައި އޭނާ ކުޅުނު ޖޫލިއަޓްގެ ކެރެކްޓާއަށް އަށް ވަނީ އެންމެ މޮޅު ބަތަލާގެ ގޯލްޑެން ގްލޯބް އެވޯޑު ލިބިފައެވެ. އާޖަންޓީނާއަށް އުފަން އޮލީވިއާ އެންމެ ފަހުން ކުޅުނީ 2015 ވަނަ އަހަރު ރިލީޒްކުރި "ސޯޝަލް ސުއިސައިޑް" އެވެ.
ބަތަލާ ކުޅުނު މަގްބޫލު ބައެއް ފިލްމުތަކުގެ ތެރޭގައި "ލޮސްޓް ހޮރިޒަން"، "ހެޑް ސްޕޭސް"، "އައިސްކްރީމް މޭން"، "ބްލެކް ކްރިސްމަސް" އަދި "އޯލް ރަ ދައިޓް ނޮއިޒެސް" ހިމެނެއެވެ. އޭނާ މަރުވިއިރު ދުނިޔޭގައި އޭނާގެ ފިރިމީހާ ޑޭވިޑް ގްލެން އާއި ތިން ދަރިން ދުނިޔޭގައި އެބަ ތިއްބެވެ. ބަތަލާ ވަނީ އޭނާގެ ހަޔާތުގައި ތިން ކައިވެންޏެއްކޮށްފައެވެ. އަދި އެ ތިން ކައިވެންޏަށް ކޮންމެ ކައިވެންޏަކަށް ދަރިއަކު ލިބިފައިވެއެވެ.
