އިންޑިއާގެ މަތީ ފަންތީގެ އިންފްލުއެންށަ އެއް އަދި ޓްރެވަލް ކޮންޓެންޓް ކްރިއޭޓަރެއް ކަމަށްވާ ނިކީ މެހެރާ ދިވެހިރާއްޖެ އައިސް ރާއްޖެ ޕްރޮމޯޓު ކޮށްފިއެވެ.
ނިކީ ރާއްޖެ އައިސްފައި ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ފެމިލިއަރައިޒޭޝަން ދަތުރަކަަށް މި މަހު 3 ކުން 6 އަކަށެވެ.
ރާއްޖެ އައިސް ނިކީ ހުރީ ސަނީ ސައިޑް އޮފް ލައިފް ރިސޯޓުގައެވެ. މި ދަތުރުގައި ނިކީ ވަނީ ރާއްޖޭގައި ހޭދަކުރި ލަގްޒަރީ ތަންތަނުގެ އިތުރުން ރޮމޭންޓިކް މަންޒިލް ތަކުގެ ފޮޓޯ ސޯޝަލް މީޑިއާގައި ހިއްސާ ކޮށްފައެވެ. ސޯޝަލް މީޑިއާގައި ބައި މިލިއަނަށްވުރެ ގިނަ މީހުން ނިކީ އަށް ފޮލޯކުރެއެވެ.
އެމްއެމްޕީއާރްސީ އިން ބުނީ ނިކީގެ މި ދަތުރުގެ ސަބަބުން އެމްއެމްޕީއާރްސީގެ ލަގްޒަރީ ޓްރެވެލް ސެގްމަންޓާއި ހަނީމޫން މާކެޓުގައި ކުރިއެރުން ލިބިގެންދާނެ ދަތުރެއް ކަމަށާއި މި ދަތުރުގައި ނިކީ ވަނީ ރާއްޖެ އަކީ އިންޑިއާގެ ދަތުރުވެރިންނަށް އެންމެ ބޮޑު ހަނީމޫން ޑެސްޓިނޭޝަނެއްގެ ގޮތުގައި ދައްކައިދީފައި ކަމަށެވެ.
އިންޑިއާގެ މާކެޓަކީ ފަތުރުވެރިކަމުގައި ރާއްޖެއަށް މުހިންމު މާކެޓެކެވެ. އެގޮތުން މެއި މަހުގެ 13 ވަނަ ދުވަހާ ހަމައަށް 46,970 ޓޫރިސްޓުންނާ އެކު މިހާރު ރާއްޖެއަށް އަންނަ އެންމެ ގިނަ ފަތުރުވެރިން އަންނަ ގައުމުތަކުގެ ލިސްޓުގެ ހަ ވަނައިގައި އޮތީ އިންޑިއާއެވެ.
އެމްއެމްޕީއާރުސީ އަކީ ދިވެހިރާއްޖެއަށް އަންނަ ފަތުރުވެރިން އިތުރުކުރުމަށް މަސައްކަތްކުރާ ކުންފުންޏެކެވެ. އެމްއެމްޕީއާރްސީ އިން ދަނީ ރާއްޖޭގެ ހިތްގައިމުކަން ދައްކާލުމަށް ގިނަ ހަރަކާތްތަކެއް ރާވަމުންނެވެ. އެގޮތުން ޖޮއިންޓް ކެމްޕެއިންތަކާއި ފެމިލިއަލައިޒޭޝަން ދަތުރުތަކާއި ބޮޑެތި އިވެންޓްތަކުގައި ބައިވެރިވުމާއި އެހެނިހެން ކެމްޕެއިންތައް ވެސް ހިންގައެވެ.
