ސިޔާސީ ޕާޓީއެއް އުފެއްދީ ވަކި ސިޔާސީ އުސޫލުތަކަކާއެކު، އެ ގޮތަށް ތަބާވާންކަމަށާއި އެހެން ނަމަވެސް އެމްޑީޕީގެ ވެރިކަމުގެ ދެވަނަ ދައުރުގައި ފެނިގެން ދިޔައީ ޕާޓީ އުފެއްދި މަގުސަދާ ދުރަށް ދިޔަ މަންޒަރުކަމުގައި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ލަންކާގެ "ދަ މޯނިން" ނޫހަށް ދެއްވި އިންޓަވިއުއެއްގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ވަކިވެ، ދަ ޑިމޮކްރެޓްސް އުފެއްދީ ކީއްވެގެން ތޯއާއި އަމިއްލައަށް އުފެއްދި ޕާޓީން ވަކިވާންޖެހުމުގެ އިހްސާސާ ގުޅޭ ގޮތުން ކުރި ސުވާލަކަށް ޖަވާބު ދެއްވަމުންނެވެ. މިގޮތުން ނަޝީދު ވިދާޅުވީ ވެރިކަމުގެ ދެވަނަ ދައުރުގައި ފެނިގެން ދިޔައީ ޕާޓީ އުފެއްދި މަގްސަދުތަކާ ހިލާފު މަންޒަރުތަކެއްކަމަށާއި، އެހާ ހިސާބުން އެ ޕާޓީގައި އުޅެން އުނދަގޫވިކަމަށެވެ. "އަޅުގަނޑަށް ދަ ޑިމޮކްރެޓްސްގެ އެއްވެސް ރަސްމީ މަގާމެއްގައި ނެތިން." ނަޝީދު ވިދާޅުވިއެވެ.
މީގެ އިތުރުން ނަޝީދު ވިދާޅުވީ އެ މަނިކުފާނު އެމްޑީޕީ އިން ދުރަށް ދިޔަ ހިސާބުން ރިޔާސީ އިންތިހާބާ ރައްޔިތުންގެ މަޖިލީހުގެ އިންތިހާބުގައި އެ ޕާޓީއަށް ކުރިމަތިވީ ނާކާމިޔާބީ ކަމަށެވެ. ދެ އިންތިހާބުންވެސް ބަލިވުމަކީ ހިތާމަހުރި ކަމެއްކަމެއްކަން ފާހަގަކުރައްވަމުން ނަޝީދު ވިދާޅުވީ އެހެންނަމަވެސް ކޮންމެ ނާކާމިޔާބީ އަކީ އިބުރަތެއްކަމުގައެވެ.
ރައްޔިތުންނަށް ވެވޭ ވައުދުތަކާ އެއްގޮތަށް ނުހިނގާނަމަ އިންތިހާބު ކާމިޔާބު ކުރުމުގެ ބޭނުމެއް ނެތްކަން ފާހަގަކުރައްވަމުން ނަޝީދު ވިދާޅުވީ އެމްޑީޕީ ސަރުކާރެއް އައީ ކުރީގެ ވެރިކަމުގެ ކޮރަޕްޝަން ތަހުގީގު ކުރަން ވައުދުވެގެންކަމަށެވެ. އެހެންނަމަވެސް އެކަން ކުރެވިފައިނުވާކަމަށް ނަޝީދު ވިދާޅުވިއެެވެ. އިތުރަށް ނަޝީދު ވިދާޅުވީ އެމްޑީޕީ ވެރިކަމަށް އައީ ރާއްޖޭގެ ދަރަނިތައް ކުޑަކުރުމަށް ވައުދުވެގެން ކަމަށާއި އެހެންނަމަވެސް އޭގެ ބަދަލުގައި ދަރަނި އަދާކުރުމަށް ނެގީ އިތުރު ލޯނުތައް ކަމަށެވެ. "އަޅުގަނޑު ދެކުނީ ޒިންމާދާރުކަން ކުޑަ ވެރިކަމެއް. އެމީހުންގެ ލޮލުން މެނިފެސްޓޯ ގެއްލިގެން ދިޔަ. ވައުދުވީ ކަންތައްތައް ކުރުމުގެ ބަދަލުގައި އަޅުގަނޑުމެން އިންވެސްޓް ކުރަމުން ދިޔައީ ހަމައެކަނި އަޅުގަނޑުމެންގެ ދަރަނީގެ ބުރަ އިތުރުވާ ވެނިޓީ ޕްރޮޖެކްޓްތަކަށް" ނަޝީދު ވިދާޅުވިއެވެ.
މީގެ ތިން އަހަރުކުރިން ނަޝީދަށް ދިން ހަމަލާ އާއި ގުޅޭގޮތުން ވާހަކަދައްކަމުން އެ މަނިކުފާނު ވިދާޅުވީ އެހަމަލާއިން ސަލާމަތްވި ނަމަވެސް ހިތާމައަކީ ހިތާމައަކީ އެ ހަމަލާގެ އަސްލު ސަބަބު ސަރުކާރަށް އަދިވެސް ހޯދިފައިނުވުން ކަމަށެވެ. އެމަނިކުފާނަށް ހަމަލާދިނުމުގައި ބައިވެރިވި މީހުން ހޯދިފައި ވީ ނަމަވެސް އެކަމަށް ފައިސާ ހޯދައިގެން ރޭވި މީހުން އަދިވެސް ހޯދިފައިނުވާކަން ފާހަގަކުރައްވަމުން ނަޝީދު ވިދާޅުވީ އެ މަނިކުފާނަށް ފުރިހަމަ ރައްކާތެރިކަން ލިބިފައިވާކަމަށް ބުނަން، އަދިވެސް ދަތިކަމަށެވެ.
ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ ހައިސިއްޔަތުން ކުރައްވަމުން ގެންދަވާ މަސައްކަތްޕުޅާ ގުޅޭގޮތުން ނަޝީދު ވިދާޅުވީ އެއީ ރައްޔިތުންނަށް ފައިދާހުރި މަސައްކަތްތަކެއްކަމުގައި ގަބޫލުކުރައްވާ ކަމަށެވެ. އަދި މިވަގުތު ގާނާގައި ދިރިއުޅުއްވަމުން، އެމަނިކުފާނު ކުރައްވަމުން ގެންދަވާ މަސައްކަތްތަކާ މެދު ހިތްހަމަޖެހިވަޑައިގަންނަވާކަން ނަޝީދު ވަނީ ފާހަގަކުރައްވާފައެވެ.
