ކަލާޒް ޗެނަލުން ދައްކަމުން އަންނަ މަޝްހޫރު ރިއަލިޓީ ޝޯ "ބިގް ބޮސް" ގެ 17 ވަނަ ސީޒަން އިން ވިކީ ޖެއިން އެލިމިނޭޓް ވެއްޖެއެވެ.
މަޝްހޫރު ޓީވީ އަދި ބޮލީވުޑް ބަތަލާ އަންކިތާ ލޯކަންޑޭގެ ފިރިމީހާ، ވިކީ އެ ޝޯ އިން އެލިމިނޭޓްވީ ޝޯގެ ގްރޭންޑް ފިނާލޭ ބާއްވަން ކުޑަ ދުވަސްކޮޅަކަށްވެފައި އޮއްވައެވެ. ވިކީ ވަނީ އެ ގޭތެރޭގައި 100 އަށްވުރެ ގިނަ ދުވަސް ހޭދަކޮށްފައެވެ. ބިގް ބޮސް ގެ އެންމެ ފަހު އެޕިސޯޑުގައި ޝޯގެ ހޯސްޓް ސަލްމާން ހާން ވަނީ އަންކިތާ، ވިކީ އަދި އަރުން ގާތު ގަނޑުކޮޅެއް ނެގުމަށްބުނެފައެވެ. އަދި "އެވިކްޓެޑް" ލިޔެފައިވާ ގަނޑުކޮޅު ނެގޭ މީހަކު ޝޯ އާ އަލްވަދާއުވާނެ ކަމަށް ބުނެފައެވެ. ކަންދިމާކުރި ގޮތުން އެ ގަނޑުކޮޅު ނެގުނީ ވިކީ އަށެވެ.
ވިކީ ޝޯ ދޫކޮށް، ޝޯ ބާއްވަމުން އަންނަ ގެ ދޫކޮށް ދާން އުޅުމުން އޭނާގެ އަނބިމީހާ އަންކިތާ ވަރަށް ރުޔެވެ. ވަދާއުގެ ސަލާމްކުރުމަށްފަހު އަންކިތާ ބުނީ ވިކީ އަކީ މި ޝޯގެ އެއްވަނަ ކަމަށާއި އެކަން އެގޮތަށް އޭނާ ގަބޫލުކުރާ ކަމަށެވެ. އަދި މި ގޭމު ވިކީ ކުޅުނީ ކުޅެންވާ ގޮތަށް ކަމަށާއި އާންމުންގެ ގިނަ ސަމާލުކަން ވިކީ ހޯދީ ހަމައެކަނި މި ޝޯ މެދުވެރިކޮށް ކަމަށްވެސް އަންކިތާ ބުންޏެވެ. އަދި ވިކީގެ އަނބިމީހާއަށް ވުމަކީ އަންކިތާ އަށް ލިބޭ ވަރަށް ބޮޑު ފަހުރެއް ކަމަށްވެސް ބަތަލާ ވަނީ ބުނެފައެވެ.
ވިކީ ޝޯ އިން ވަކިވުމާއެކު އަންކިތާ އެ ކުޅުނު "ޑްރާމާ" އަކީ ބޮޑު ފޭކެއް ކަމަށް ގިނަ ބެލުންތެރިން ގަބޫލު ކުރިއެވެ. މުޅި ޝޯގައި ވެސް އަންކިތާ، ވިކީ އަށް އިހާނެތިކޮށް ކަންތައްކޮށް، އޭނާގެ ކުރީގެ ލޯބިވެރިންގެ ވާހަކަ ދައްކާފައިވާ ކަމަށާއި ވިކީ ޝޯ އިން އަލްވަދާއު ކިޔުމުން އަންކިތާ އަށް އެއްވެސް އަސަރެއް ނުކުރާނެ ކަމަށް ބެލުންތެރިން ބުންޏެވެ.
އަންކިތާ އާއި އަރުން އަކީ މިހާރު މި ޝޯގެ ފައިނަލިސްޓުންނެވެ. މި ޝޯގެ ގްރޭންޑް ފިނާލޭ އޮންނާނީ މި މަހުގެ 28 ވަނަ ދުވަހުގެ ރޭގަނޑެވެ. އެންމެ ފަހުން ގެނެސްދިން ބިގް ބޮސް ސީޒަން 16 ކާމިޔާބުކުރީ އެމްސީ ސްޓޭންއެވެ.
