ބިޑަކާ ނުލާ އަމިއްލަ ފަރާތްތަކަށް ޕްރޮޕޯސަލް ހުށަހެޅޭ ގޮތަށް މާލިއްޔަތު ގަވާއިދަށް އިސްލާހު ގެނެސްފިއެވެ.
އިއްޔެ ތަސްދީގު ކުރި އެ އިސްލާހުގައިވާ ގޮތުން ސަރުކާރުން އިއުލާން ނުކުރާ މަޝްރޫއުތަކަށް އަމިއްލަ ފަރާތްތަކުން އިސްނަގައިގެން ޕްރޮޕޯސަލް ހުށަހެޅޭނެއެވެ.
އިއްޔެ ގެނައި އިސްލާހުގައި ބުނާގޮތުން ޑައިރެކްޓު އުސޫލުން އަދި ޕްރައިވެޓް ސެކްޓާ އިނިޝިއޭޓިވްގެ ދަށުން މަސައްކަތް ހަވާލު ކުރާ ހާލަތުގައި މަސައްކަތް ހަވާލުކުރާނެ ފަރާތެއް ކަނަޑައަޅާނީ މަސައްކަތުގެ ބާވަތް، އަގު އަދި އެ އޮފީހެއްގެ މާލީ ޒިންމާދާރު ވެރިޔާ އެ ފަރާތަކަށް މަސައްކަތް ހަވާލުކުރަން ނިންމި ސަބަބު ފިނޭންސް މިނިސްޓަރަށް ހުށަހެޅުމުން މިނިސްޓަރުގެ ލަފާގެ މަތިންނެވެ.
ޕްރައިވެޓް ސެކްޓާ އުސޫލުން ސަރުކާރަށް ހުށަހެޅޭ ހާލަތުގައި އެ ހުށަހެޅުމަކާމެދު ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން މަޝްރޫއު ކުރިއަށް ގެންދިއުމަށް ނިންމިދާނެ ކަމަށް ވެސް އެ އިސްލާހުގައިވެއެވެ.
އެ އިސްލާހުގައި އިތުރަށް ބުނީ ޕްރައިވެޓް ސެކްޓާ އިނީޝިއޭޓެޑް އުސޫލުން ހުށަހަޅާ ޕްރޮޕޯޒަލަކީ ސަރުކާރުން ކަނޑައަޅައިފައިވާ ވަކި މަޝްރޫއަކަށް ނުފެތޭ، ނަމަވެސް ސަރުކާރުގެ ތަރައްގީގެ އަމާޒުތަކަށް ވާސިލުވުމަށް އެހީތެރިކަން ފޯރުކޮށްދޭފަދަ މަޝްރޫއުތަކާ ގުޅޭ ޕްރޮޕޯޒަލަކަށް ވާންޖެހޭނެ ކަމަށް އެ އިސްލާހްގައިވަނީ ބުނެފައެވެ. އަދި ސަރުކާރުގެ ސްޓްރެޓިޖިކް ޑިވެލޮޕްމަންޓް ޕްލޭނުގައި ބަޔާންކޮށްފައިވާ ކަންތައްތައް އީޖާދީގޮތެއްގައި (އިނޮވޭޓިވް ގޮތެއްގައި) އަދި ފުދުންތެރި ގޮތެއްގައި ހާސިލުކުރުމަށް މަގުފަހިކޮށްދިނުމަށް ހުށަހަޅާ ޕްރޮޕޯޒަލްތަކަށް ވާން ޖެހޭނެ ކަމަށް ބުނެފައިވެއެވެ.
މީގެއިތުރުން ހުށަހަޅާ ޕްރޮޕޯސަލްގައި ހިމެނޭ މަޝްރޫއުއަކީ ޕްރޮޕޯސަލް ހުށަހެޅުމުގެ ކުރިން ސަރުކާރުން ކުރިއަށް ގެންދަން އިއުލާނު ކޮށްފައިވާ ނުވަތަ ރާވާފައިވާ މަޝްރޫއުއެއް ނަމަ، އެފަދަ ޕްރޮޕޯސަލްއެއް ހުށަނޭޅޭނެ ކަމަށް އެ އިސްލާހުގައިވެއެވެ. އަދި އެ ހުށަހަޅާ މަޝްރޫއުއަކީ ސަރުކާރުން، އެފަދަ މަޝްރޫއުއެއްގެ މަސައްކަތް ކުރާނެ ބަޔަކު ހޯދަން މަސައްކަތް ފަށާފައިވާ މަޝްރޫއުއަކަށް ވެސް ވެގެން ނުވާނެ ކަމަށް ވެސް އިސްލާހުގައި ވަނީ ބަޔާންކޮށްފައެވެ.
