މި ސަރުކާރުން ކުރިޔަށް ގެންދާ ގެދޮރުވެރިޔާ ސްކީމުގެ ދަށުން ފުރަތަމަ ބުރުގައި ފްލެޓް ލިބޭ 4،000 މީހުންގެ ލިސްޓާމެދު އަވަސް ފިޔަވަޅުތަކެއް އަޅަން ޖެހޭނަމަ އަޅާނެ ކަމަށް އޭންޓި ކޮރަޕްޝަން ކޮމިޝަން (އޭސީސީ)އިން ބުނެފިއެވެ.
އޭސީސީގެ މީޑިއާ އޮފިޝަލް "ދަ ޕްރެސް" އަށް ވިދާޅުވީ ފްލެޓް ލިސްޓު އާންމު ކުރުމާ ގުޅޭ މައްސަލައެއް ވެސް އެ ކޮމިޝަނަށް ލިބިފައިވާ ކަމަށެވެ. އަދި ހުށަހެޅި މައްސަލަތައް ކޮމިޝަނުން ދިރާސާ ކުރަމުންދާ ކަމަށެވެ.
މި މައްސަލައާ ގުޅިގެން އަވަސް ފިޔަވަޅެއް އަޅަން ޖެހޭތޯ ބެލުމަށްފަހު އެކަމާމެދު މިއަދު ގޮތެއް ނިންމާނެ ކަމަށް ވެސް އޭނާ ވަނީ ވިދާޅުވެފައެވެ.
ސަރުކާރުގެ ގެދޮރުވެރިޔާ ސްކީމްގެ ދަށުން އިމާރާތް ކުރަމުންދާ 4،000 ފްލެޓު ލިބޭ މީހުންގެ ލިސްޓު އިއްޔެ ވަނީ އާންމު ކޮށްފައެވެ. ހައުސިން މިނިސްޓްރީ އިން އިއްޔެ އާންމު ކުރި ލިސްޓުގައިވާ ގޮތުން ތިން ކޮޓަރީގެ ފްލެޓަށް ހުށަހަޅާފައިވާ މީހުންގެ ތެރެއިން ފްލެޓް ލިބެނީ 76 މާކްސް އިން ފެށިގެން މަތިން މާކްސް ލިބިފައިވާ ފަރާތްތަކަށެވެ. އަދި ދެ ކޮޓަރީގެ ފްލެޓަށް ހުށަހަޅާފައިވާ މީހުންގެ ތެރެއިން ފްލެޓް ލިބެނީ 73 މާކްސް އިން ފެށިގެން މަތިން މާކްސް ލިބިފައިވާ ފަރާތްތަކަށެވެ.
ފްލެޓްއަށް އެދި ހުށަހެޅި ފަރާތްތަކަށް ޕޮއިންޓްދީފައިވާ ގޮތާމެދު ހިތްހަމަނުޖެހި، ހައުސިން މިނިސްޓްރީއަށް ގޮސް ގިނަ ބަޔަކު ވަނީ އިހްތިޖާޖު ކުރަންފަށާފައެވެ. ހައުސިން މިނިސްޓްރީ ދަށަށް އެއްވެ ތިބި މީހުންނާ ބައްދަލު ކުރައްވާ ހައުސިން މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު، ވިދާޅުވީ ޕޮއިންޓް ދީފައިވަނީ ފޯމްގައި ފުރިހަމަކޮށްފައި ހުރި މައުލޫމާތުތަކަށް ބެލުމަށްފަހު ކަމަށެވެ.
ގިނަ ބަޔެއްގެ ޝަކުވާތައް ހުރުމާއެކު އެ މިނިސްޓްރީއިން މިހާރު ވަނީ ފްލެޓްގެ ދާއިމީ ލިސްޓާ ގުޅިގެން ޝަކުވާ ހުށަހަޅަން ބޭނުންވާ ފަރާތްތަކަށް އެ ފުރުސަތު ހުޅުވާލާފައެވެ. މިއަދުން ފެށިގެން އަންނަ ބުރާސްފަތި ދުވަހުގެ ހަވީރު 4:00އާ ހަމައަށް "ގެދޮރުވެރިން ޕޯޓަލް" މެދުވެރިކޮށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާ ކަމަށް އެ މިނިސްޓްރީއިން ބުނެއެވެ.
ފްލެޓްތަކަށް ކުރިމަތިލި 20،697 މީހުންގެ ތެރެއިން ޝަރުތުހަމަވާ، އެންމެންނަށް ފްލެޓް ދޭން ސަރުކާރުން ވަނީ ނިންމާފައެވެ. އެގޮތުން އިއްޔެ އިއުލާނު ކުރި 4،000 ފްލެޓް ލިބޭ މީހުންގެ އިތުރުން ފްލެޓްއަށް ޝަރުތު ހަމަވާ ބާކީ ތިބި 9،000 މީހުންނަށް ލިޔުމެއް ދޭނެ ކަމަށް މިނިސްޓްރީން ވަނީ ބުނެފައެވެ.
