2021 ވަނަ އަހަރު ނެޓްފްލިކްސް އިން ސްޓްރީމް ކުރި ކާމިޔާބު ސީރީޒް "ސްކުއިޑް ގޭމްސް" އަށް ބިނާކޮށް އުފައްދާފައިވާ ސްކުއިޑް ގޭމްސް: ދަ ޗެލެންޖް" ރިއަލިޓީ ގޭމް ޝޯ އަންނަ މަހު ނެޓްފްލިކްސް އަށް ގެންނަން ނިންމައިފިއެވެ.
އަންނަ މަހު 22 ވަނަ ދުވަހު ނެޓްފިކްސް އިން ސްޓްރީމްކުރަން ހަމަޖެހިފައިވާ މި ޝޯ އަކީ ސީރީޒް އާ ވެސް ވަރަށް އެއްގޮތަކަށް ކުރިއަށް ގެންދާ ޝޯއެކެވެ. ޖުމްލަ ދިހަ އެޕިސޯޑު ހިމެނޭ މި ޝޯގައި ވެސް 456 ބައިވެރިން ބައިވެރިވާއިރު މި ގޭމް ޝޯ އިން މޮޅުވާ މީހަކަށް 4.56 މިލިއަން ޑޮލަރުގެ އިނާމު ލިބޭނެއެވެ. އެއާއެކު މި ރިއަލިޓީ ގޭމް ޝޯ ވެގެންދާނީ ތާރީހުގައި ވެސް ގޭމް ޝޯއަކުން މޮޅުވެއްޖެނަމަ އެންމެ ބޮޑު ފައިސާގެ އަދަދު ލިބޭ ގޭމް ޝޯ އަށެވެ.
ރެކޯޑު އަދަދަކަށް "ސްކުއިޑް ގޭމްސް" ގެ ސީރީޒް މީހުން ބެލިއިރު މި ސީރީޒް ވެފައިވަނީ މިހާތަނަށް ނެޓްފްލިކްސް އިން ނެރުނު އެންމެ ކާމިޔާބު އެއް ސީރީޒަށެވެ. މި ސީރީޒުގެ ފުރަތަމަ ބައެއް އާންމުންނާ ހަމައަށް ގެނެސްދީފައިވާއިރު މި ސީރީޒްގެ ދެވަނަ ބައެއް ވެސް ގެންނާނެ ކަމަށް ފިލްމުގެ ޓީމުން ވަނީ މިދިޔަ އަހަރު އިއުލާންކޮށްފައެވެ. މި ސީރީޒް ސްޓްރީމް ކުރި ފަހުން މަޝްހޫރު ޔޫޓިއުބަރުން ވެސް ވަނީ ސްކުއިޑް ގޭމްސް، ހަގީގީ ދިރިއުޅުމުގައި ކުޅޭ ވީޑިއޯ ތަކެއް އުފައްދާފައެވެ. އޭގެ ތެރޭގައި މިސްޓާ ބީސްޓް އަދި ބްރެންޓް ރިވޭރާ ހިމެނެއެވެ.
