ގިނަ އަދަދެއްގެ (ޓްރެޝަރީ ބިލް) ޓީ ބިލް ވިއްކަން އަނެއްކާވެސް ފިނޭންސް މިނިސްޓްރީން ހުޅުވާލައިފިއެވެ.
ދައުލަތުގެ ހަރަދު އިންތިހާއަށް ބޮޑުވެފައިވާ އިރު ހަރަދުތައް ފޫބައްދަން ހުރި ގޮންޖެހުންތަކާ ހުރެ ޓީ ބިލް ވިއްކަނީ ދައުލަތުގެ އާމްދަނީން ހަރަދުތައް ދެކޮޅު ނުޖެހި ސަރުކާރު ހިންގުމަށް އިތުރަށް ފައިސާ ބޭނުންވުމުން، ފައިސާ ޗާޕް ނުކޮށް އެކަން ކުރެވޭނެ ގޮތް ހެދުމަށެވެ.
ދައުލަތުގެ ހަރަދު އިންތިހާއަށް ބޮޑުވަމުންދާ މި ދަނޑިވަޅުގައި ޓީ ބިލް ވިއްކުމަށް ހުޅުވާލާފައި އެކި މުއްދަތުތަކުން މެޗޫރިޓީ [ދަންކަންޖެހޭ މުއްދަތު] ވާގޮތަށެވެ.
- 28 ދުވަހުން ދައްކަން ޖެހޭ - 1.4 ބިލިއަން ރުފިޔާ ގެ ޓީ ބިލް
- 99 ދުވަހުން ދައްކަން ޖެހޭ - 215 މިލިއަން ރުފިޔާގެ ޓީ ބިލް
- 182 ދުވަހުން ދައްކަން ޖެހޭ - 658 މިލިއަން ރުފިޔާގެ ޓީ ބިލް
- 364 ދުވަހުން ދައްކަން ޖެހޭ - 322 މިލިއަން ރުފިޔާގެ ޓީ ބިލް
މި ހުރިހާ ޓީ ބިލްގެ އަދަދު 3 ބިލިއަނާ ގާތް ކުރެއެވެ.
ތަފާސް ހިސާބުތައް ދައްކާ ގޮތުގައި ޖުލައި މަހުގެ ޓީބިލްގެ ދަރަނި ނަގައި ނުދައްކާ ހުރި އަދަދު 38.34 ބިލިއަން ރުފިޔާ އަށް އަރައެވެ. އަދި މި އަހަރުގެ ދެވަނަ ކުއާޓާ ހަމައަށް މި އަދަދު އުޅެނީ 40.01 ބިލިއަން ރުފިޔާގައެވެ.
އާންމު ގޮތެއްގައި ރާއްޖޭގައި ވިއްކާ ޓީބިލްތަކުގެ ރޭޓް އުޅެނީ 3.50 ޕަސެންޓާއި 4.60 ޕަސެންޓާ ދެމެދުގައެވެ. ފިނޭންސް މިނިސްޓްރީން ވިއްކާ ޓީބިލްތައް އަމިއްލަ ކުންފުނިތަކުގެ އިތުރުން ސަރުކާރުގެ ބައެއް ކުންފުނިތަކުން ވެސް ގަނެއެވެ. މީގެ ކުރިންވެސް ސަރުކާރުން ވަނީ ބޮޑެތި އަދަދު ތަކުން ޓީ ބިލް ވިއްކާފައެވެ. އެގޮތުން މިދިޔަ މެއި މަހުވެސް ޓީ ބިލް ވިއްކާފައި ވާއިރު އެފަހަރު ވެސް 3.3 ބިލިއަން ރުފިޔާގެ ޓީބިލް ވަނީ ވިއްކާފައެވެ.
ޓީބިލާއި ޓީބޮންޑުގެ މައުލޫމާތު މީގެ ކުރިން މަރުކަޒީ ބޭންކް (އެމްއެމްއޭ) އިން އާންމު ކުރަމުން ދިޔަ ނަމަވެސް 2021 ވަނަ އަހަރުން ފެށިގެން ޓީބިލް ވިއްކައި ތަފާސް ހިސާބުތައް ބެލެހެއްޓުން ވަނީ ފިނޭންސް މިނިސްޓްރީގެ ދަށަށް ބަދަލު ކޮށްފައެވެ.
ދަވާލާތި