މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަ ބުރަށް ރީ-ރަޖިސްޓާ ވުމަށް މިހާތަނަށް 25،493 ފޯމް ހުށަހަޅައިފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
ދެވަނަ ބުރުގައި ރީ-ރަޖިސްޓްރީވުމަށް ހުޅުވާލާފައި ވަނީ ދެ ދުވަހުގެ މުއްދަތެކެވެ. އަދި އެ ފުރުސަތު މިއަދު ހަވީރު 4 ޖަހާއިރު ހަމަވާނެ ކަމަށް އީސީ އިން ބުނެއެވެ.
އީސީގެ ނައިބު ރައީސް އިސްމާއީލް ހަބީބް ވިދާޅުވީ ރީ-ރަޖިސްޓްރީ ވުމަށް ހުޅުވާލި ފުރަތަމަ ދުވަހު 9206 މީހުން ރީ-ރަޖިސްޓަރީ ކުރަން ފޯމު ހުށަހެޅި ކަމަށާއި ދެވަނަ ދުވަހު 16287 ރީ-ރަޖިސްޓަރީ ކުރަން ފޯމު ހުށަހަޅާފައިވާ ކަމަށެވެ. އަދި އޮންލައިންކޮށް ފުރަތަމަ ދުވަހު 7267 މީހަކު ހުށަހެޅިއިރު ދެވަނަ ދުވަހު 11082 އޮންލައިންކޮށް ރީ-ރަޖިސްޓްރީ ކުރަން ހުށަހަޅި ކަމަށް ހަބީބް ވިދާޅުވިއެވެ.
ހަބީބް ވިދާޅުވީ މިހާތަނަށް ދެވަނަބުރުގައި 10271 މީހުން ރީ-ރަޖިސްޓަރީ ކޮށްދެވިފައިވާ ކަމަށާއި ރީ-ރަޖިސްޓަރީ ކުރަން ދެވަނަބުރުގައި ހުށަހެޅި ފޯމުތަކުން އެކިއެކި ސަބަބުތަކާ ހުރެ މިހާތަނަށް 1546 ފޯމު ރިޖެކްޓް ކޮށްފައިވާ ކަމަށެވެ. އަދި ފޯމުތައް ރިޖެކްޓް ވަނީ ހުށަހަޅަންޖެހޭ ހުރިހާ މައުލޫމާތު ފުރިހަމަ ނުވާތީ ކަމަށާއި އޮންލައިންކޮށް ހުށަހަޅާފައިވާ ފޯމުތަކުން ޕެންޑިން ކަމަށް ދައްކަނީ އެ ފޯމުތަކުގެ ވެރިފިކޭޝަން މަރުޙަލާ މުޅިން ނުނިމޭތީ ކަމަށް ހަބީބް ވިދާޅުވިއެވެ.
ހަބީބް ވިދާޅުވީ ފޯމުތަކުގެ ސައްހަކަން ކަށަވަރުވިހާ އަވަހަކަށް ރީ-ރަޖިސްޓަރީ ކުރެވުނު ކަމުގެ މެސެޖް ލިބޭނެ ކަމަށެވެ.
ހަބީބް އިތުރަށް ވިދާޅުވީ މިއަދު ހަވީރު 4 ޖެހުމަށްފަހު ދެން ރީ-ރަޖިސްޓްރީކުރުމަށް އިތުރު ފުރުސަތެއް ލިބުމަކީ ނާދިރުކަމެއް ކަމަށާއި އެމީހަކު ވޯޓުލާން ރަޖިސްޓަރީ ވެފައިވަނީ ކޮންތަކަށްތޯ މިހާރުން މިހާރަށްވެސް ޗެކް ކުރުމަކީ ވަރަށް މުހިންމު ކަމެއް ކަމަށެވެ.
ރިޔާސީ އިންތިހާބުގެ ދެވަނަބުރުގެ ރީ-ރަޖިސްޓާ ކުރުމަށް ގިނަ އަދަދެއްގެ ފޯމު ހުށަހަޅާ ފަރާތްތަކުގެ ފޯމުގެ ސައްހަކަން ކަށަވަރު ކުރުމަށް އީސީގެ ފޯނު ނަންބަރަކުން، ފޯމު ހުށަހަޅާ ފަރާތްތަކަށް ގުޅާނެ ކަމަށް އީސީއިން ވަނީ ބުނެފައެވެ. އަދި ސައްހަނޫން ފޯމެއް ހުށަހަޅައިފިނަމަ، އެ ފޯމެއް ހުށަހެޅި ފަރާތަކާ މެދު ފިޔަވަޅު އަޅާން އީސީއިން ނިންމާފައިވާ ކަމަށް އީސީއިން ވެސް އީސީއިން ބުނެއެވެ.
މީގެ އިތުރުން، އީސީއިން ވަނީ އެއްވެސް މީހެއްގެ ވޯޓުލުމުގެ ހައްގަށް އެއްވެސް ފަރާތަކުން ހުރަސް ނޭޅުމަށް އެދިފައެވެ.
ރިޔާސީ އިންތިހާބުގެ ދެވަނަ ބުރުގެ ވޯޓު ނެގުމާއި، ގުނުމުގެ ކަންތައްތައް އޮބްޒާވު ކުރުމަށާއި، މޮނިޓާ ކުރުމަށް ޝައުގުވެރިވާ ފަރާތްތަކަށާއި، ކެންޑިޑޭޓުންގެ މަންދޫބުންގެ ގޮތުގައި، ކެންޑިޑޭޓުންގެ ފަރާތުން ފޯމު ހުށަހެޅުމަށް ފުރުސަތު ހުޅުވާލައިފައިވާއިރު ފޯމު ހުށަހެޅުމުގެ ސުންގަޑިއަކީ މިއަދުގެ މެންދުރުފަހު 3 ޖަހާއިރެވެ.
