މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބާ ގުޅިގެން 29 މައްސަލައެއް މިއަދާ ހަމައަށް ހުށަހަޅާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
އޭސީސީ އިން ބުނީ ރިޔާސީ އިންތިހާބާއި ގުޅިގެން އިންތިހާބީ ކޮރަޕްޝަންގެ މައްސަލަތަކުގެ ގޮތުގައި މިއަދާހަމައަށް ޖުމްލަ 29 މައްސަލަ ނުވަތަ ޝަކުވާ އެ ކޮމިޝަނަށް ލިބިފައިވާ ކަމަށެވެ.
ހުށަހެޅި 29 މައްސަލައިގެ މައްސަލަތަކުގެ ތެރެއިން 7 މައްސަލައެއް ތަހުގީގުކުރަންޖެހޭ މައްސަލަތައް ކަމަށް ފެންނާތީ އެ މައްސަލަތަކުގެ ތަހުގީގު މިހާރު ފަށާފައިވާ ކަމަށް އެ ކޮމިޝަނުން ބުނެއެވެ.
އޭސީސީ އަށް ހުށަހެޅި މައްސަލަތަކުގެ ތެރޭގައި ދައުލަތުގެ މުދާލާއި ވަސީލަތްތައް ނަހަމަގޮތުގައި ބޭނުންކުރުމާއި، ރިޝްވަތާ ގުޅުހުންހުރި މައްސަލަ ހިމެނޭ ކަމަށް އެ ކޮމިޝަނުން ބުނެއެވެ. އެ ކޮމިޝަނަށް ހުށަހެޅި ބަލަމުންގެންދާ މައްސަލަތަކުގެ ތެރޭގައި ހުޅުމާލެއިން ގޯތި ދޫކުރި ގޮތާއި، ގުރުއަތުލުން ކުރިއަށްގެންދިޔަ ގޮތާގުޅޭ މައްސަލައެއް ހިމެނޭ ކަމަށް ވެސް ވަނީ ބުނެފައެވެ.
އިތުރަށް ބުނީ އެ މައްސަލަތަކާއި ގުޅިގެން އަޅަންޖެހޭ ފިޔަވަޅުތައް ކޮމިޝަނުން އަޅަމުންދާ ކަމަށެވެ. އަދި ބައެއް ފިޔަވަޅުތައް އެޅޭނީ ބައެއް ކަންކަން ދެނެގަނެ ކަށަވަރުކުރެވިގެން ކަމުގައިވާތީ ކަމާ ގުޅޭ އިތުރު މައުލޫމާތު ހޯދުމުގެ މަސައްކަތް ވެސް މިހާރު ކުރަމުން ގެންދާ ކަމަށެވެ.
